حکومت کو سپریم کورٹ میں منہ کی کھانی پڑے گی، پرویز الٰہی

25 مارچ ، 2023

اسلام آباد (جنگ نیوز) پاکستان تحریک انصاف کے صدر چودھری پرویزالٰہی نے کہا ہے کہ الیکشن کمیشن کے پاس الیکشن شیڈول منسوخ کرنے کا کوئی اختیار نہیں۔ الیکشن کمیشن نے اپنے آئینی اختیارات سے تجاوز کیا۔ انشاء اللہ حکومت اور الیکشن کمیشن کو اپنے اس غیر آئینی فیصلے پر سپریم کورٹ میں منہ کی کھانی پڑے گی۔سپریم کورٹ کے واضح حکم کے بعد کوئی ادارہ الیکشن میں تعاون سے انکار نہیں کرسکتا،الیکشن کمیشن کا کام الیکشن کرانا ہے۔ الیکشن روکنا نہیں۔انہوں نے ٹویٹر پر اپنے بیان میں کہا کہ الیکشن شیڈول منسوخ کروا کے ن لیگ نے پنجاب میں شکست تسلیم کرلی، شہبازشریف اور محسن نقوی آرٹیکل 6 کے مرتکب ہوئے ہیں، آئین کی خلاف ورزی کو اعلیٰ عدلیہ اور عوام کسی صورت برداشت نہیں کریں گے، کوئی ادارہ الیکشن میں تعاون سے انکار نہیں کرسکتا۔الیکشن شیڈول منسوخ کروا کے شہبازشریف اور محسن نقوی نے آئین توڑا اور سپریم کورٹ کی توہین کی ہے۔ اسحاق ڈار، خواجہ آصف اور رانا ثنااللہ کی وزارتوں نے شہبازشریف اور محسن نقوی نے اپنی پولیس، آئی جی اور چیف سیکرٹری کے کہنے پر الیکشن کیلئے فنڈز اور عملہ فراہم کرنے سے انکار کیا۔ چیف جسٹس واضح طو ر پر کہہ چکے ہیں کہ اگر کوئی بدنیتی سامنے آئی، تو سپریم کورٹ مداخلت کرے گی۔ آئین کی اس خلاف ورزی کی اجازت نہ اعلیٰ عدلیہ دے گی اور نہ عوام اسےکسی صورت برداشت کریں گے۔