جنرل ہولڈ اپ میں غیر حاضر5ایکسائز افسروں کیخلاف کارروائی

لاہور (نیوزرپورٹر)ڈائریکٹر جنرل ایکسائز،ٹیکسیشن اینڈ نارکوٹکس کنٹرول محمد علی نے 5 ایکسائز افسروں کے خلاف کارروائی کرتے ہوئے ایک دن کی تنخواہ کاٹنے کا حکم دیدیا۔ ٹوکن ٹیکس نادہندہ گاڑیوں کے خلاف جنرل ہولڈ اپ کے دوران ڈی جی نے ویڈیو کال کے ذریعے پنجاب بھر میں افسران کی حاضری چیک کی تو یہ ای ٹی او ناکوں پر موجود نہ تھے۔ان میں بھکر کے محمد اسداللہ، ملتان کے خالد حسین، لودھراں کے نفیس احمد، راجن پور کے جام عبدالرزاق اور سرگودھا کےراؤ افتخار شامل ہیں۔ بغیر رخصت غیر حاضری کا جرمانہ کرتے ہوئے ان کی ایک دن کی تنخواہ بحق سرکار ضبط کرنے کا حکم دیدیا جس پر ڈپٹی ڈائریکٹر ہیڈ کوارٹرز عدیل امجد نے سیکریٹری ایکسائزکو مراسلہ بھجوا دیا ہے۔ ڈی جی نے محکمہ کے تمام ملازمین کوتنبیہ کی ہے کہ وہ فرائض ایمانداری سے سرانجام دیں اور چھٹی منظور کرائے بغیر ڈیوٹی سے غیر حاضر نہ ہوں۔