شوگر انڈسٹری آج سے عوام کو 20روپے کلو رعایتی چینی فراہم کریگی

اسلام آباد (رپورٹ:حنیف خالد) پاکستان شوگر ملز ایسوسی ایشن پنجاب نے ماہ رمضان میں 20روپے فی کلو سستی چینی عوام کو فراہم کرنے کا اعلان کیا ہے۔ اس اعلان پر عملدرآمد حکومت پنجاب کے تعاون سے آج 27مارچ 2023ء سے شروع ہو گا۔ پاکستان شوگر ملز ایسوسی ایشن پنجاب کے چیئرمین چوہدری محمد ذکاء اشرف نے یہ بات جنگ سے خصوصی گفتگو کرتے ہوئے کہی۔ انہوں نے بتایا کہ شوگر انڈسٹری نے پنجاب بھر میں نگران حکومت کے ساتھ تعاون کرتے ہوئے ہر ضلع میں رعایتی ریٹ پر چینی کی فراہمی کیلئے ایک ایک شوگر ملز کو مقرر کیا ہے۔ جب اُن سے پوچھا گیا کہ آپ اس ریٹ پر چینی سستے سٹالوں پر مہیا کرینگے تو اُنہوں نے بتایا کہ ہم بیس روپے کی رعایت فی کلو صارفین خریداروں کو دینگے۔ انہوں نے دعویٰ کیا کہ شوگر انڈسٹری کی پیداواری لاگت ایک سو پندرہ روپے فی کلو ہے۔ 26مارچ کو اوپن مارکیٹ اور بڑے تھوک دکانداروں سے جب چینی کے ریٹ دریافت کئے گئے تو بتایا گیا کہ 5100روپے کی پچاس کلو چینی کی بوری آتی ہے جبکہ ہم لوگ ایک سو دس روپے فی کلو گاہک کو دے رہے ہیں۔ جب اُن سے پوچھا گیا کہ گلی محلے کے دکانوں والے کیا بھائو چینی فروخت کر رہے ہیں تو انہوں نے بتایا کہ وہ لوگ لفافے میں چینی ڈال کے دیتے ہیں‘ اسلئے وہ ہم سے ایک سو دس روپے فی کلو چینی خرید کر ایک سو پندرہ سے ایک سو بیس روپے صارفین کو دے رہے ہیں۔