مجوزہ کراس فیول سبسڈی نےآئی ایم ایف سے تنازع کھڑا کردیا،عالمی مالیاتی ادارے کو اسٹاف لیول سمجھوتہ موخرکرنےکاجوازمل گیا

اسلام آباد (مہتاب حیدر) وزارت پٹرولیم کی جانب سے پٹرول پر مجوزہ نامکمل اور غیر حتمی کراس فیول سبسڈی نے آئی ایم ایف کے ساتھ تنازع کھڑا کردیا ہے جس سے عالمی مالیاتی ادارے کے عملے کو اسٹاف لیول سمجھوتے کو موخر کرنے کا جواز فراہم کردیا ہے۔ آئی ایم ایف نے کراس فیول سبسڈی کا ابتدائی منصوبہ رد کرتے ہوئے اسکے موثر ہونے کے حوا لے سے مزید تفصیلات مانگی ہیں۔ اب سوال یہ پیدا ہوتاہے کہ وزیراعظم کے دفتر اور وزارت پٹرولیم نے آئی ایم ایف کے ریویو مشن کو اعتماد میں لیے بغیر مذکورہ سہولت کا کیسےعجلت میں اعلان کردیا۔ وزارت خزانہ نے بھی کراس فیول سبسڈ ی کی ذمہ داری لینے سے خود کو علیحدہ کرلیاہے۔ وزارت پٹرولیم کومشورہ دیا گیاہےکہ وہ اس مرحلے پراپنی تجویز واپس لے اور وزارت خزانہ کے ساتھ مجوزہ پالیسی کی قابل عمل تًفصیلات طے کرے اور آئندہ ریویو کے موقع پر آئی ایم ایف کواعتماد میں لے۔ سرکاری ذرائع کے مطابق ایک اور سوال یہ بھی اٹھتا ہے کہ جب مذکورہ مجوزہ پالیسی پر 6؍ ہفتوں بعد ہی عمل ہوناتھا تو اس کا قبل از وقت اعلان کیوں کیا گیا۔ دریں اثناء پاکستان میں متحدہ عرب امارات کے سفیر حماد عبید سالم الزابی نے بدھ کو یہاں وفاقی وزیر خزانہ اسحاق ڈار سے ملاقات کی اور ان سے اقتصادی اور مالی تعلقات کومزید مستحکم بنانے پر تبادلہ خیال کیا۔ سفیر نے پاکستان کے مختلف اقتصادی شعبوں میں مزید سرمایہ کاری پر گفتگو کی۔