الیکشن کمیشن کے فارمولے کے تحت سیکورٹی فراہم نہیں کرسکیں گے،پنجاب پولیس

لاہور(صباح نیوز)عدالتی احکامات پر پنجاب پولیس نے انتخابات کیلئے سیکورٹی کی ورکنگ مکمل کرلی۔ پولیس حکام نے کہا ہے کہ الیکشن کمیشن کے فارمولے کے تحت سیکورٹی فراہم نہیں کرسکیں گے۔سپریم کورٹ آف پاکستان نے الیکشن کمیشن آف پاکستان کے الیکشن التوا کا فیصلہ کالعدم قرار دیتے ہوئے پنجاب میں14مئی کو عام انتخابات کرانے کا حکم دیا تھا۔عدالتی احکامات پر پنجاب پولیس نے انتخابات کیلئے سیکورٹی کی ورکنگ مکمل کرلی۔ رپورٹ کے مطابق الیکشن کمیشن نے 53 ہزار سے زائد پولنگ اسٹیشنز میں 30 فیصد پولنگ سٹیشنز حساس قرار دئیے ہیں، حساس پولنگ اٹیشنز پر 11 اور کم حساس پر 8 جوانوں کی ڈیمانڈ کی گئی ۔پولیس حکام کا کہنا ہے کہ الیکشن کمیشن کے فارمولے کے تحت 4 لاکھ کے قریب نفری بنتی ہے، اس فارمولے کے تحت سیکورٹی فراہم نہیں کرسکیں گے۔پنجاب پولیس نے مزید کہا ہے کہ لاہور سمیت پنجاب بھر میں ایک لاکھ کے قریب سیکورٹی اہلکار فراہم کرسکتے ہیں، 35 ہزار سے زائد جوان لاہور پولیس میں الیکشن کیلئے ڈیوٹیاں دیں گے، 50 ہزار ملازمین ریلیوں، جلسے جلوسوں کیلئے سیکورٹی ڈیوٹیوں پر تعینات کئے جائیں گے۔پولیس حکام نے بتایا کہ دہشت گردی کے خدشات کے پیش نظر 7 ہزار اہلکار حساس تنصیبات پر تعینات ہوں گے، کل تک پولیس موجودہ وسائل میں سیکورٹی پلان فراہم کردے گی۔