ساڑھے نو لاکھ سے زائد آٹے کے تھیلے تقسیم کئے جا چکے ہیں ،ڈپٹی کمشنر

راولپنڈی(نمائندہ جنگ) ڈپٹی کمشنر راولپنڈی حسن وقار چیمہ نے کہا ہےکہ ضلع راولپنڈی میں مفت آٹے کی فراہمی کے لیے 11 میگا سینٹر قائم کئے گئے ہیں اب تک ساڑھے نو لاکھ سے زائد آٹے کے تھیلے تقسیم کئے جا چکے ہیں، آٹے کی مفت سہولیات سے راولپنڈی کے 3لاکھ 16 ہزار خاندان مستفید ہوچکے ہیں، انہوں نے کہاکہ 4لاکھ 83 ہزار سے زائد خاندانوں میں مفت آٹے کی تقسیم کے حوالے سے ٹارگٹ مقرر کیا گیا تھا۔ ضلع راولپنڈی میں ساڑھے 14 لاکھ سے زائد آٹے کے تھیلے تقسیم ہونے کئے جائیں گے، ان خیالات کا اظہار انہوں نے ٹیپو روڈ پر قائم مفت آٹا مرکز کے دورہ کے دوران میڈیا سے گفتگو کرتے ہوئے کیا۔ان کا کہنا تھا کہ اب تک راولپنڈی میں مفت آٹے کے حوالے سے کوئی ناخوشگوار واقعہ پیش نہیں آیا، مفت آٹے کی تقسیم کا سلسلہ 25 رمضان تک جاری رہے گا۔ گِراں فروشوں کے خلاف بھی ایکشن لے رہے ہیں۔ شہریوں سے زائد نرخ وصول کرنے والے 1325 دوکانداروں کو 40 لاکھ سے زائد کے جرمانے کئے گئے۔