گلزار امام عرف شمبے کی دہشتگرد کارروائیوں میں بھارتی ہاتھ ثابت

09 اپریل ، 2023

اسلام آباد (نامہ نگار خصوصی) گزشتہ روز مقتدر انٹیلی جینس ایجنسیوں کی کاوشوں سے گرفتار ہونے والا ”گلزار امام عرف شمبے“ کی دہشتگرد کارروائیوں کے پسِ پشت بھارتی ہاتھ ثابت ہوگیا ہے اور پاکستان کو غیر مستحکم کرنے کی کوششوں میں بھارت کے مسخ کردار کا بھارتی سیاسی اور عسکری قیادت نے بے شرمی اور ڈھٹائی سے اعتراف بھی کرلیا ہے۔ تفصیلات کے مطابق بھارتی ناسور کا یہ پہلا واقعہ نہیں جس میں وہ پاکستان میں ریاستی دہشتگردی کو اپنے ناپاک عزائم کیلئے بڑھانا چاہتا ہے۔ ماضیِ قریب میں بھی بھارتی سیاسی اور عسکری قیادت مختلف فورمز پر پاکستان دشمنی میں اپنی دہشتگردانہ پالیسیوں کا بے شرمی سے اعتراف کرچکی ہے۔ مودی کی مکارانہ چالیں بلوچستان کے امن و امان کو تباہ کرنا چاہتی ہیں جہاں کے چند ناسمجھ عناصر بھارتی ایماپر ریاست کے خلاف دہشتگردی کو ہوا دے رہے ہیں۔ مودی کا بیان جس میں وہ پاکستان پر من گھڑت الزام لگاتا ہے کہ ریاست سے بلوچستان نہیں سنبھل رہا، اس سے پوچھا جائے کہ بھارت میں چلنے والی سینکڑوں علیحدگی پسند تحریکیں جن میں خالصتان تحریک سرِفہرست ہے اس کے روکنے پر مودی کی ناسور حکومت کا کتنا اختیار ہے۔ نیشنل سکیورٹی ایڈوائزر، اجیت کمار دوول کا کہنا ہے کہ پاکستان ہمارا دشمن ہے، دنیا کے سامنے دہشتگردی کو پاکستان میں عام کرنے کیلئے مالی مدد کا انکار کیا جائے لیکن پسِ پردہ انکو پہلے سے بھی زیادہ مالی امداد فراہم کی جائے۔دہشتگردوں کو پیسہ دو اور ان سے کام لو، کیونکہ دہشتگرد کرائے کے قاتل ہیں۔ سابق بھارتی چیف آف آرمی سٹاف جنرل وکرم سنگھ کا کہنا ہے کہ پاکستان کے ہی عوام کو پیسے کے زور پراستعمال کر کے اپنی بنائی ہوئی پالیسیوں سے بلوچستان میں قتل و غارت کا بازار گرم کرنا ہو گا، ہم نے اپنی مکمل سیاسی، معاشی، سفارتی ،نفسیاتی ،انٹیلی جینس غرض ہر سطح پر پاکستان کی مرکزی طاقت یعنی اسکے عوام کو استعمال کرکے ان کی حکومت پر زور ڈالنا ہے۔ پاکستان کی علیحدگی پسند تنظیموں اور تحریکوں خصوصا بلوچستان میں تیل چھڑکنے کی ضرورت ہے تا کہ پاکستانی فوج کی توجہ ان تحریکوں اور انکے تدارک میں صرف ہوگی نہ کی کشمیر اور بھارت کی طرف دیکھے گی اور اسکے لئے وہاں خون بہانا ضروری ہوگا اور یہی ہماری اسٹریٹیجی ہے۔ سابقہ امریکی سیکرٹری دفاع چیک ہیگل کے مطابق بھارت ہمیشہ سے افغانستان کو پاکستان کیلئے دوسرے محاذ کے طور پر استعمال کرتا ہے۔ ماضی میں کلبھوشن یادیو نے بھارتی احکامات پر پاکستان خصوصابلوچستان اور کراچی میں انتشار، دہشتگردی اور دسیوں خودکش حملے کروانے کا اعتراف کیا تھا جسے پاکستان کی مقتدر انٹیلی جینس ایجنسی نے گرفتار کیا تھا۔بلوچ انتہا پسند تنظیم بی ایل اے کے سربراہ اللہ نذر بلوچ نے بھی علیحدگی تحریک اور تخریب کاری کی کارروائیوں کیلئے بھارت اور دوسرے ممالک سے سفارتی اور مالی معاونت کیلئے بھیک مانگی تھی۔ ملک سے بھاگے ہوئے براہمداغ بگٹی نے بھی اپنے داغ دار بیان میں بھارت سے امداد کیلئے ہاتھ پھیلائے اور اسی طرح کے تعاون کی خواہش کی جس طرح بھارت نے پاکستان کو دولخت ہوتے وقت کی تھی۔بھارت شاید یہ بھول گیا ہے کہ پاکستان کے غیور اور باوفا عوام اپنے ایمان کا سودا نہیں کر سکتے۔ افواجِ پاکستان اور عوام کا لازوال رشتہ ہمیشہ قائم رہے گا کیونکہ اسی میں ملک کی بقا اور سلامتی ہے۔