راولپنڈی ، کاروباری شخصیت اغوا کے بعد قتل ، مسلح افراد لاش پھینک کر فرار

17 اپریل ، 2023

راولپنڈی(این این آئی)تھانہ مورگاہ کے علاقے ڈیفنس روڈ پر ریوالونگ لائٹ لگی ویگو گاڑی میں سوار مسلح افراد کاروباری شخصیت فرحان اسرار وارثی کو قتل کرنے کے بعد ہتھکڑی لگی لاش فوجی فاونڈیشن ہسپتال کے باہر پھینک کر فرار ہوگئے۔حکام کے مطابق پیڑولیم و ہوٹلنگ کے کاروبار سے منسلک کاروباری شخصیت فرحان اسرار کے بارے میں بتایا جاتا ہے کہ انکے کلائنٹس میں غیر ملکی کمپنیز بھی شامل ہیں۔فرحان اسرار اپنے دوست و ملازم کے ہمراہ گاڑی پر ڈیفنس جا رہے تھے کہ اچانک ویگو گاڑی جس پر پولیس کی ریوالونگ لائٹ بھی لگی ہوئی تھی میں سوار کالے رنگ کی وردیوں میں ملبوس مسلح افراد نے گاڑی زبردستی رکوائی۔ فرحان اسرار کو ہتھکڑی لگا کر اپنی گاڑی میں بٹھا لیا اور ہمراہ موجود افراد کو دیگر مسلح افراد نے کور کرکے انکی گاڑی میں لیکر چلنا شروع کیا تو کچھ فاصلے پر مغوی سے مزاحمت کے دوران ملزمان نے فائرنگ کی۔گولی فرحان اسرار کے چہرے پر لگنے سے وہ دم توڑ گیا جس پر ملزمان گاڑی چھین کر متوفی کی ہتھکڑی لگی لاش اور ساتھ موجود دونوں افراد کو فوجی فاونڈیشن ہسپتال کے باہر پھینک کر فرار ہوگئے۔اطلاع ملنے پر پولیس و فورنزک ایجنسی کے حکام موقع پر پہنچے اور لاش کو پوسٹ مارٹم کیلئے ہسپتال منتقل کرکے شواہد اکھٹے کیے۔پولیس حکام کے مطابق مقتول پیڑولیم کا کاروبار بھی کرتا تھا، تمام پہلوؤں کو مدنظر رکھ کر تحقیقات کی جا رہی ہیں جبکہ فوجی فاونڈیشن ہسپتال کے باہر اور جہلم روڈ سمیت ڈیفنس روڈ جہاں سے ان افراد کو اغواء کیا گیا وہاں کی سی سی ٹی وی کیمروں کی فوٹیجز بھی حاصل کی جا رہی ہیں۔