صدر آزاد کشمیر کیلئے مرسیڈیز گاڑی کی خرید کیلئے جاری ٹینڈر منسوخ،ترجمان

مظفرآباد(صباح نیوز)صدر آزاد جموں و کشمیر بیرسٹر سلطان محمود چوہدری کیلئے مرسیڈیز گاڑی کی خرید کیلئے جاری کیا جانے والا ٹینڈر منسوخ کر دیا گیا ہے ۔ ایک سرکاری بیان میں کہا گیا ہے سینٹرل ٹرانسپورٹ پول محکمہ سروسز اینڈ جنرل ایڈمنسٹریشن آزادحکومت ریاست جموں وکشمیر کی جانب سے مرسیڈیز گاڑی کی خرید کیلئے جاری کیا جانے والا ٹینڈر تاریخ اشاعت03 اپریل 2023سے منسوخ کردیا گیاہے۔ اس سلسلے میں سینٹرل ٹرانسپورٹ پول محکمہ سروسز اینڈ جنرل ایڈمنسٹریشن نے اخبارات کو ایک اشتہار بھی جاری کیا ہے ۔ترجمان محکمہ سروسز اینڈ جنرل ایڈمنسٹریشن آزادحکومت ریاست جموں وکشمیر کے مطابق موجودہ مالی حالات کے پیش نظر حکومت آزادکشمیر نے فیصلہ کیا تھا کہ نئی گاڑیاں نہیں خریدی جائیں گی۔