اوچشریف: کار سے بھاری مقدار میں افیون اور بھنگ برآمد،2 ملزمان گرفتار

اوچشریف (نامہ نگار) ایم فائیو پر موٹر وے پولیس نے منشیات فروشی کے خلاف کارروائی کرتے ہوئے بھاری مقدار میں افیون اور بھنگ برآمد کر لی تفصیلات کے مطابق ایم فائیو سیکٹر ون ملتان موٹروے پولیس افسران نے دوران گشت ایک مشکوک کار کی تلاشی لی تو گاڑی کی ڈگی میں سے 12 بیگ افیون اور بھنگ کے برآمد ہوئے ۔ موٹروے پولیس افسران نے بروقت کارروائی کرتے ہوئے دونوں مشکوک افراد کو گرفتار کر لیا،ملزمان منشیات سیالکوٹ سے رحیم یار خان اسمگل کررہے تھے۔ موٹروے پولیس نے ملزمان کو گاڑی اور منشیات سمیت مزید قانونی کارروائی کے لئے تھانہ دھوڑکوٹ پولیس کے حوالے کر دیا۔ ڈی آئی جی موٹروے پولیس محمد سلیم چوہدری نے متعلقہ پولیس افسران کو بہترین کارکردگی پر ان کو سراہا۔