پی ٹی سی ایل : پہلی سہ ماہی کی آمدن میں23 فیصد اضافہ

لاہور( جنگ نیوز)پی ٹی سی ایل نے 31 مارچ 2023 کو ختم ہونے والی پہلی سہ ماہی کے مالیاتی نتائج کا اعلان کر دیا ۔ مشکل میکرو اکنامک حالات کے باوجود پی ٹی سی ایل نے پچھلے سال کے مقابلہ آمدن میں 23.2 فیصد اضافہ کیا۔ یہ خاطر خواہ اضافہ فکسڈ براڈ بینڈ، موبائل ڈیٹا، بزنس سلوشنز اور بینکاری خدمات میں مضبوط کارکردگی سے ہوا۔ میکرو اکنامک چیلنجز کے منفی اثرات 2023 میں بھی کاروباری اداروں کو متاثر کر رہے ہیں۔ توانائی اور ایندھن کے نرخوں میں مسلسل اضافہ سے ٹیلی کام آپریٹرز کوکم قیمت پر معیاری خدمات فراہم کرنے میں سخت مشکلات کا سامنا ہے۔ پاکستان کے ادائیگیوں کے توازن کے مسائل اور ایل سی کھولنے پر پابندیوں نے آپریٹرز کے نیٹ ورک رول آؤٹ ٹائم لائنز کو متاثر کیا ہے۔ ڈالر کے مقابلہ روپے کی گرتی قدر، بڑھتی شرح سودٹیلی کام آپریٹرز پر اضافی ٹیکسوں نے منافع کو بری طرح متاثر کیا ہے۔