ملتان ‘تشہیری بورڈز فیس میں مبینہ خورد برد ‘ 7کروڑ کا نقصان پہنچانے کا الزام

ملتان (سٹاف رپورٹر) ضلع کونسل افسران اور ٹھیکیدار کی ملی بھگت سے تشہیری بورڈز کی فیس میں خورد برد کاالزام، 52 غیر قانونی تشہیری بورڈز کی ریکوری ریکارڈ میں ظاہر نہ کرنے سے ضلع کونسل کو 7 کروڑ روپے کا نقصان پہنچایا گیا، شہری کی درخواست اور عدالتی احکامات پر کمشنر ملتان ڈویژن نے معاملے کی انکوائری شروع کر دی، 2018- 19 میں ضلع کونسل کے تشہیری بورڈز کا ٹھیکہ 3 کروڑ 10 لاکھ روپے کا ہوا، 2019 سے 2021 تک سیلف ریکوری کے تحت فیس وصولی کا سلسلہ جاری رکھا گیا، جس میں کروڑوں روپے کی خورد برد کی گئی، محکمانہ انکوائری ٹھپ کر کے معاملے کو دبا دیا گیا، اب 23-2022 کا ٹھیکہ 2 کروڑ 56 لاکھ میں دیا گیا، 52 غیر قانونی تشہیری بورڈز ظاہر نہیں کیے گئے، جس سے ضلع کونسل کو تقریباً 7 کروڑ روپے کی ریکوری سے محروم رکھا گیا، سرکاری ریکارڈ میں ’’20 - 60‘‘ کے 8 تشہیری بورڈز ظاہر کیے گئے جبکہ اسی سائز کے 52 تشہیری بورڈ ظاہر نہیں کیے گئے، شہری قاسم قریشی نے ٹھیکیداروں اور ضلع کونسل افسران کی بظاہر ملی بھگت کے خلاف اینٹی کرپشن اور عدالت سے رجوع کیا، عدالتی احکامات پر کمشنر ملتان نے معاملے کی انکوائری شروع کر دی، اس سلسلے میں ایڈمنسٹریٹر ضلع کونسل و ڈپٹی کمشنر عمر جہانگیر، ڈسٹرکٹ آفیسر فنانس ملک لیاقت اور درخواست گزار قاسم قریشی کو 29؍ اپریل کو طلب کیا گیا ہے۔