ٹریفک حادثات میں دوبھائیوں سمیت 5 افراد جاں بحق

رحیم یا رخان،کوٹ ادو، ڈیرہ غازیخان(سٹی رپورٹر،نمائندہ جنگ،نامہ نگار) ٹریفک حادثات میں دو بھائیوں سمیت پانچ افراد جاں بحق ہوگئے۔تفصیل کے مطابق ڈی جی خان میں رند اڈا کے مقام پر پکٹ غازی گھاٹ پر تیز رفتار بس نے محکمہ فوڈ میں تعینات درجہ چہار م کےاہلکار محمد ابراہیم کو کچل ڈالا اور مو قع سے فرار ہو گیا، ابراہیم موقع پر دم توڑ گیا۔ اسی طرح رحیم یار خان میں بستی ادوجا کا رہائشی 55 سالہ خادم حسین موٹرسائیکل پر قومی شاہراہ پرجارہاتھاکہ نامعلوم کار سے ٹکر ہوگئی، خادم حسین موقع پر دم توڑ گیا۔ڈرائیور کار سمیت فرارہوگیا۔ چک25پی کا رہائشی28سالہ محمدفیضان موٹرسائیکلوں کے تصادم میں شدید زخمی ہو ا، اس کو ہسپتال منتقل کیاگیا، جہاں محمدفیضان جانبرنہ ہوپایا اوردم توڑگیا۔دوسری جانب کوٹ ادو کے نواحی علاقے قصبہ احسان پور کے رہائشی محمد سلطان 2بیٹے 16سالہ محمد عدنان اور 9 سالہ محمد رمضان موٹر سائیکل پر جارہے تھے کہ بنگلہ شاہ جمال کے قریب ٹریکٹر ٹرالی سے ٹکرا گئے۔جس کے نتیجے میں محمد عدنان موقع پر جاں بحق ہو گیا جبکہ اس کا چھوٹا بھائی محمد رمضان شدید زخمی ہو ا۔ریسکیو ٹیم نے لاش لواحقین کے حوالے کردی جبکہ زخمی کو تحصیل ہیڈ کوارٹر ہسپتال کوٹ ادو منتقل کیا ، جہاں اسے تشویشناک حالت کےباعث نشتر ہسپتال ملتان روانہ کیا ۔رمضان زخموں کی تاب نہ لاتے ہوئے راستہ میں ہی دم توڑ گیا۔ ورثا نے ٹریکٹر ٹرالی ڈرائیو کے خلاف کسی قسم کی قانونی کاروائی کرنے سے انکار کردیا ہے۔