طلحہ محمود کو وفاقی وزیر مذہبی امور کا اضافی چارج،ذمہ داریاں سنبھال لیں

اسلام آباد ( نیوز رپورٹر) وفاقی وزیر بر ائے سرحدی و ریاستی امور سینیٹر محمد طلحہ محمود کو وفاقی وزیر مذہبی امور کا اضافی چارج دے دیا گیا ۔ وزیر اعظم کی منظوری کے بعد کابینہ ڈویژن نے نوٹیفکیشن جاری کردیا ۔ سینیٹر محمد طلحہ محمود نے وزارت مذہبی امور کا قلمدان ملنے کا بعد ذمہ داریاں سنبھال لیں۔ مفتی عبدالشکور کے انتقال کے بعد وزارت مذہبی امور کا قلمدان خالی ہوا تھا جسے اب سینیٹر محمد طلحہ محمود سنبھالیں گے۔ سینیٹر طلحہ محمود کا تعلق جمعیت علماء اسلام پاکستان سے ہے،ان کے پاس وزیر سیفران کا قلمدان ہے۔منگل کو وزیراعظم کی طرف سے اضافی قلمدان ملنے پر وزارت مذہبی امور آ کر انہوں نے وزارت کی ذمہ داریاں سنبھالیں۔ وزیر مذہبی امور نے سابق وزیر مذہبی امور مفتی عبدالشکور کی خدمات پر انہیں خراج عقیدت پیش کیا اور ان کے ایصال ثواب کے لئے دعا کی۔ اس موقع پر وزارت کے ایڈیشنل سیکرٹری حج ونگ کے افسران اور عملے سے ملاقات کی۔ اس موقع پر وزیرمذہبی امور کو حج انتظامات کے حوالے سے مختصر بریفنگ دی گئی۔ وزیر مذہبی امور نے کہا کہ حج ایک فرض عبادت ہے اللہ کے مہمانوںکے لئے سہولیات مہیا کرنا بڑی ذمہ داری اور دوہرے اجر کا کام ہے۔ وزیر مذہبی امور سینیٹر محمد طلحہ محمود نے کہا کہ بہترین حج انتظامات کے لئے تمام تر صلاحیتوں کو بروئے کار لائیں گے۔ عازمین حج کی آسانی کے لئے کم وقت میں زیادہ کام کرنا ہو گا۔