پاکستان کو موسمیاتی بحرانوں سےنمٹنےکیلئے348بلین ڈالرکی ضرورت

اسلام آباد(آئی این پی )پاکستان کو2030تک موسمیاتی بحرانوں سے نمٹنے کیلئے348بلین ڈالر کی ضرورت ہے،پاکستان کی معیشت شدید موسمی واقعات سیلاب خشک سالی سے بری طرح متاثر ہوئی ،موسمیاتی تبدیلیوں سے ہیٹ اسٹروک اور سانس کی بیماریوں میں اضافہ ہوا ،کسانوں کو فصلوں کی ناکامی، مویشیوں کے نقصانات اور شدید موسمی واقعات کی وجہ سے آمدنی میں کمی کا سامنا کرنا پڑا ،حالیہ سیلاب سے بحالی کے لیے16.5بلین ڈالر درکار ہیں۔ پلاننگ کمیشن میں پائیدار ترقی کے اہداف کے چیف محمد علی کمال نے کہا کہ موسمیاتی تبدیلی کے اثرات شدت اختیار کر رہے ہیں، ترقی یافتہ ممالک کے لیے ضروری ہے کہ وہ ذمہ داری لیں اور اس کے اثرات کو کم کرنے کی کوششوں میں ترقی پذیر ممالک کی مدد کریں۔ اس امداد میں موسمیاتی سے متعلقہ منصوبوں کی فنانسنگ، تکنیکی مہارت فراہم کرنا، اور ٹیکنالوجی کی منتقلی کو فروغ دیناشامل ہے۔ انہوں نے کہا کہ اگرچہ اس وقت پاکستان جیسے ممالک کے پاس ماحولیاتی تبدیلیوں سے ہونے والے نقصانات کے لیے بڑے آلودگی پھیلانے والوں کے خلاف قانونی چارہ جوئی کا کوئی طریقہ کار نہیں ہے لیکن ترقی یافتہ ممالک اپنی تاریخی ذمہ داریوں سے پیچھے نہیں ہٹ سکتے۔ اگرچہ ان میں سے بہت سے ممالک نے ترقی پذیر ممالک میں موسمیاتی تبدیلیوں کو کم کرنے کی کوششوں میں مدد کے لیے گرین کلائمیٹ فنڈز میں حصہ ڈالنے کا وعدہ کیا ہے لیکن ان وعدوں کو پورا کرنے کے لیے ابھی بہت کچھ کرنا باقی ہے۔