خفیہ ادارے پر حملے کی منصوبہ بندی کرنیووالے 2 دہشتگرد ہلاک

لاہور ( این این آئی) کائونٹر ٹیررازم ڈیپارٹمنٹ کے راجن پور میں انٹیلی جنس بنیادوں پر کئے گئے آپریشن میں 2 دہشتگرد ہلاک ہو گئے،دہشت گردوں سے دھماکا خیز مواد، اسلحہ، ڈیٹونیٹر، پرائما کورڈ برآمد ہوا ۔ترجمان سی ٹی ڈی پنجاب کے مطابق دہشت گردوں میں الیاس اور عرفان اللہ شامل ہیں، جو خفیہ ادارے پر حملے کی منصوبہ بندی کر رہے تھے۔ترجمان کی جانب سے جاری بیان کے مطابق سی ٹی ڈی ٹیم راجن پور کو ایک مصدقہ ذریعے سے اطلاع ملی کہ کالعدم تنظیم ٹی ٹی پی جماعت الاحرار) 5دہشتگرد راجن پور میں حساس ادارے پر حملہ کرنے کی منصوبہ بندی کر رہے ہیں جو کہ تھانہ روجھان کی حدود میں موجود ہیں۔ذرائع کے مطابق دہشتگردوں کے پاس دھماکہ خیز مواد اور اسلحہ ہے۔ سی ٹی ڈی کی ٹیم موقع پر پہنچ گئی لیکن دہشتگردوں نے سی ٹی ڈی ٹیموں پر براہ راست فائرنگ کر دی۔ دہشت گردوں اپنے آپ کو 2گروہوں میں تقسیم کیا اور شدید فائرنگ کے تبادلے کے دوران 2 دہشتگرد ہلاک ہوگئے۔جبکہ 3دہشتگرد اندھیرے کا فائدہ اٹھا کر فرار ہو گئے۔ہلاک ہونے والے دہشتگردوں کی شناخت الیاس عرف عبداللہ ولد طور خان ذات ملیزئی، باشندہ مردان جب کہ دوسرے کی شناخت عرفان اللہ عرف قاری عبداللہ ولد جعفر ذات شیری خیل رہائشی تحصیل پنڈیالی ضلع،مہمند ایجنسی کے طور پر ہوئی۔ دہشتگردوں سے کلاشنکوف، میگزین، 31رائونڈز، 30بور بندوقیں، 20رائونڈز، دھماکا خیز مواد، پرائما کورڈ، غیر الیکٹرک ڈیٹونیٹر، ٹیپ حل برآمد کرلیا گیا۔