الخدمت فاؤنڈیشن کامعروف بائیکر مکرم ترین ، جہاں گرد خان کا پر تپاک استقبال

اسلام آباد ( نیوز رپورٹر) معروف بائیکر مکرم ترین ، جہاں گرد خان اور اُن کے ساتھیوں کا موٹر سائیکلوں پر سعودیہ عرب، ایران، عراق اور متحدہ عرب امارات کے سفر سے وطن واپسی پر الخدمت فاؤنڈیشن پاکستان کے دفترمیں پر تپاک استقبال کیا گیا۔اِس موقع پر الخدمت فاؤنڈیشن پاکستان کے نائب صدور ڈاکٹر مشتاق مانگٹ ،سید احسان اللہ وقاص نے الخدمت کے دیگر ذمہ داران اور رضاکاروں کے ہمراہ بائیکرز کا استقبال کیا ، انہیں عمرے کی مبارکباد پیش کی ۔ الخدمت کی جانب سے بائیکرز کےاعزاز میں افطار ڈنر کا اہتمام بھی کیا گیا۔’کراس روٹ ‘ بائیکرز کلب سے مکرم ترین نے بتایا کہ یہ 25رُکنی وفد تھا جس نے موٹر سائیکل پر عمرے کی نیت سے پاکستان سے سفرکا آغاز کیا اور براستہ ایران، عراق، متحدہ عرب امارات سعودیہ عرب کا سفر کیا۔ یہ سفر ساڑھے 3 ماہ میں مکمل ہوا۔ ڈاکٹر مشتاق مانگٹ نے اِس موقع پر کہا کہ مکرم ترین اور اُن کے ساتھی پاکستان کا روشن چہرہ ہیں ۔ ہمیں اِن جوانوں پر فخر ہے ۔ انہوں نے مزید کہا کہ کھیل اور صحت مند سرگرمیاں نوجوانوں کےلیے بہت ضروری ہیں الخدمت اپنے والینٹیئرز ڈیپارٹمنٹ کےذریعے کھیلوں کو فروغ دینے کے لیے کوشاں ہے۔