راجہ پرویز اشرف سے قادرخان مندوخیل کی ملاقات‘ متاثرہ ملازمین کمیٹی کی رپورٹ پیش کی

اسلام آباد (نمائندہ خصوصی) سپیکر قومی اسمبلی راجہ پرویز اشرف سے خصوصی پارلیمانی کمیٹی برائے متاثرہ ملازمین کے چیئرمین پروفیسر ڈاکٹر قادرخان مندوخیل نے سپیکر آفس میں ملاقات کی۔ملاقات میں پروفیسر ڈاکٹر قادر خان مندوخیل نے متاثرہ ملازمین کمیٹی کی 6 ماہ کی کارکردگی رپورٹ سپیکر قومی اسمبلی کو پیش کی۔ کارکردگی رپورٹ پر سپیکر کا اظہار اطمینان اور عملدرآمد نہ کرنے والے اداروں کے خلاف ضابطہ کی کارروائی پر اتفاق کیا گیا۔ سپیکر نے کہا کہ پارلیمانی کمیٹی کے ذریعے غریب اور پسے ہوئے سرکاری ملازمین کو ریلیف ملنا خوش آئند ہے اور یہ صدقہ جاریہ ہے۔ پارلیمانی کمیٹی کے پاس وسیع تر اختیارات ہیں اور یہ کمیٹی پارلیمان نے بنائی ہے جس کی وجہ سے اس کے احکامات پر عملدرآمد کے علاوہ کوئی دوسرا راستہ نہیں۔