PTI میں ٹکٹوں کی فروخت‘عمران سے ملاقات کا ایک کروڑ‘ اعجاز چوہدری کی آڈیولیک

لاہور(جنگ نیوز)تحریک انصاف میں ٹکٹوں کی خریدوفروخت کا معاملہ سامنے آیا ہے ‘سوشل میڈیا پر لیک ہونیوالی آڈیو میں پی ٹی آئی رہنماء اعجاز چوہدری کو ٹکٹ کیلئے عمران خان سے ملاقات کا کم ازکم ایک کروڑروپے معاوضہ مانگتے ہوئے سنا جاسکتا ہے ۔لیک آڈیو میں چوہدری حفیظ نامی شخص پی پی 114فیصل آباد سےرانا شوکت کیلئے صوبائی اسمبلی کے ٹکٹ کی بات کرتے ہیں اور ٹکٹ کے عیوض درکارڈونیشن (چندے)کاپوچھتے ہیں جس پر اعجاز چوہدری ان سے کہتے ہیں کہ چندہ تولامحدود ہے ‘جو آکر ڈونیشن کی بات کریگا اس کو پارٹی چیئرمین سے ملوادیں گے ‘ڈونیشن ایک کروڑ سے اوپر ہونا چاہئے تاکہ چیئرمین سے ملاقات ہوسکے اورٹکٹ کا امیدوار شوکت خانم اسپتال کیلئے جوچندہ دینا چاہئے وہ اس کی مرضی ہے ‘اگر ٹکٹ لینی ہو آج کل میں ہی آجا ئیں۔دوسری جانب تحریک انصاف کے رہنماءاعجازچوہدری نے آڈیوکی تصدیق کرتے ہوئے کہاہے کہ اس میں آواز میری ہی ہے مگرتین چارجگہ جوڑلگائے گئے ہیں ‘اپنی بات کرنے پر پشیمان نہیںہوں مگر میری بات کو توڑمروڑ کر جوڑاگیاہے ۔ادھر پی پی 114 فیصل آبادسے پی ٹی آئی ٹکٹ کے امیدوار رانا شوکت کے بھائی رانا شفاعت نے آڈیولیک کے حوالے سے بیان میں کہاہےکہ ان کے بھائی رانا شوکت کا اعجاز چوہدری سے بات کرنے والے محمد حفیظ نامی شخص سے کوئی تعلق نہیں ‘رانا شوکت میرٹ پر یقین رکھتے ہیں ‘آڈیوسامنے آنے پر رانا شوکت خود حیران ہیں ‘وہ اپنے شہر سے دورکسی دوسرے صوبے کے شخص سے ٹکٹ کی سفارش کیوں کروائیں گے‘ٹکٹوں کی تقسیم کے موقع پر جعلی آڈیولیک رانا شوکت کے خلاف سازش ہے ۔