پہلے یوسف گیلانی گئے اب شہباز شریف نااہلی بھگتیں گے، عمران خان

لاہور(کورٹ رپورٹر ،خصوصی رپورٹر) چیئرمین پاکستان تحریک انصاف و سابق وزیر اعظم عمران خان نے کہا کہ سپریم کورٹ کا فیصلہ نہ مان کر حکمران غلط روایت ڈال رہے ہیں، توہین عدالت پر پہلے یوسف رضا گیلانی نے نا اہلی بھگتی، اب انشا اللہ شہباز شریف بھگتے گا۔عدالت پہنچ کر میڈیا سے غیر رسمی بات کرتے ہوئے چیئرمین پاکستان تحریک انصاف عمران خان نے کہا کہ اگر حکومت عدالت کا فیصلہ نہیں مانتی اور آئین پر چلنے کو تیار نہ ہوئی پھر پاکستان میں قانون تو ختم ہوگیا۔ عمران خان نے کہا کہ ووٹ کا حق سب سے بڑا بنیادی حق ہے، اگر یہ حق نہیں دیا جاتا تو اس کا مطلب آپ آئین کو نہیں مانتے، اس کا مطلب آپ من پسند آئینی شقوں کو تسلیم کرتے ہیں۔دوسری جانب مرکزی صدر پی ٹی آئی چودھری پرویزالٰہی نے عمران خان سے ملاقات کی، پنجاب میں الیکشن کیلئے ٹکٹوں پر تفصیلی مشاورت اور ملکی سیاسی صورتحال پر بات چیت کی گئی، عمران خان نے خصوصی طور پر مونس الٰہی کی خیریت بھی دریافت کی۔ اس موقع پر گفتگو کرتے ہوئے عمران خان نے کہا کہ پنجاب اور خیبرپختونخوا کے وزرائے اعلیٰ کی جانب سے سپریم کورٹ میں درخواست دائر کر رہے ہیں، خواجہ طارق، رحیم اور فواد چودھری پیروی کریں گے۔ ملاقات کے بعد گفتگو کرتے ہوئے سابق وزیر اعلیٰ پنجاب چودھری پرویز الٰہی نے کہا کہ پنجاب میں امیدواروں پر تفصیلی مشاورت ہوئی ہے، ٹکٹوں کا اعلان عمران خان خود کریں گے، الیکشن کو روکنے کیلئے ہر غیر آئینی ہتھکنڈا استعمال کیا جا رہا ہے۔چودھری پرویزالٰہی نے کہا کہ نااہل حکمرانوں کو اپنے ہر غیر آئینی اقدام کا جواب دینا ہو گا، شہباز شریف کسی بھی صورت اقتدار سے چمٹے رہنا چاہتے ہیں چاہے انہیں آئین شکنی ہی کیوں نہ کرنی پڑے۔سابق وزیر اعلیٰ پنجاب نے کہا کہ آئین شکن شوباز شریف قوم کے سامنے بری طرح ایکسپوز ہو چکا ہے۔