حکمران اتحاد پارلیمنٹ کے دفاع کیلئے پرعزم، عمران سے مذاکرات پر منقسم

اسلام آباد(مانیٹرنگ سیل،جنگ نیوز)وزیر اعظم شہباز شریف کی زیر صدارت ہونیوالے اجلاس میں حکمرا ن اتحادپارلیمنٹ کےدفاع کیلئے پرعزم،عمران خان سےمذاکرات پرمنقسم، اتحادی جماعتوں نےپی ٹی آئی سےغیرمشروط مذاکرات پراتفاق کیا،جےیوآئی نےکہاکہ عمران خان سیاسی قوت نہیں،ڈائیلاگ کی مخالفت کرتےہیں،زین بگٹی نےکہاچیئرمین پی ٹی آئی عمران خان جھوٹاانسان ہے،بلاول بھٹونےمذاکرات کی حمایت میں کہاکہ بات چیت کےدروازےبندکردیناہمارے اصولوں کیخلاف ہے،ایم کیوایم پاکستان ، بی این پی اور خالد مگسی نے بلاول بھٹو کے مذاکرات کے مؤقف کی تائید کی ،وزیراعظم ہائوس میں ہونیوالےاجلاس میں اتحادی رہنماؤں نے معاشی حالات پرتحفظات کا اظہار اورموجودہ سیاسی صورتحال پر تبادلہ خیال کیا،اجلاس میں مرحوم وفاقی وزیر مذہبی امور مفتی عبدالشکور کے حادثے میں انتقال پر رہنماؤں کی جانب سے اظہار افسوس کے ساتھ دعائے مغفرت بھی کی گئی۔ وزیر اعظم شہباز شریف کی جانب سے امیر جماعت اسلامی سراج الحق ملاقات کے بارے میں بھی شرکاء کو آگاہ کیا گیا، پیپلز پارٹی نے اجلاس میں مذاکرات کے حوالے سے سیاسی جماعتوں سے ہونے والی مشاورت سے متعلق بریفنگ دی۔ حکومتی اتحاد نے کسی بھی سیاسی فریق سے مشروط مذاکرات کو یکسر مسترد کرتے ہوئے کہا کہ سیاست میں بات چیت کے دروازے ہر وقت کھلے ہیں، آگے بڑھنے کیلئے کسی کو بھی شرائط طے نہیں کرنی چاہئیں،اجلاس کی اندرونی کہانی کےمطابق جے یو آئی نے موقف اپنایا کہ عمران خان کوئی سیاسی قوت نہیں، اس لئے ہم پی ٹی آئی سے ڈائیلاگ کی مخالفت کرتے ہیں، شاہ زین بگٹی نے بھی کہا کہ ہم ڈائیلاگ کے عمل کے مخالف نہیں تاہم عمران خان ایک جھوٹا انسان ہے، جو بھروسے کے لائق نہیں۔اس موقع پر وزیر خارجہ بلاول بھٹو زرداری نے اپوزیشن سے مذاکرات کے معاملے پر اصرار کرتے ہوئے کہا کہ کہا بات چیت کے دروازے بند کر لینا نہ صرف ہمارے اصولوں کے برخلاف ہے بلکہ یہ غیرجمہوری اور غیرسیاسی بھی ہے۔بلاول بھٹو نے مزید کہا کہ یہ وقت کی ضرورت ہے کہ ڈائیلاگ کا راستہ اختیار کرکے ملک کو بحران سے نکالا جائے۔