سپریم کورٹ نے الیکشن کے معاملہ میں خود کوغیرضروری گھسیٹا ،احسن بھون

کراچی (ٹی وی رپورٹ) جیو کے پروگرام ”کیپٹل ٹاک“ میں میزبان حامد میرسے گفتگو کرتے ہوئے سابق صدر سپریم کورٹ بار ایسوسی ایشن احسن بھون نے کہا کہ سپریم کورٹ نے غیرضروری طور پر خود کو الیکشن کے معاملہ میں گھسیٹا ہے، تحریک انصاف کے وکیل فیصل چوہدری نے کہا کہ ملک کو اپنی خواہشات کے تابع چلانے کی کوشش میں ملک تباہی کے گڑھے میں گرتا چلا جارہا ہے،اسلام آباد ہائیکورٹ بار کے صدر نوید ملک نے کہا کہ وکلاء نے ہمیشہ آئین کی بالادستی اور آزاد عدلیہ کی جنگ لڑی ہے، موجودہ صورتحال میں معاملات مذاکرات سے ہی حل ہوسکتے ہیں۔ احسن بھون نے کہا آرٹیکل 224کی تشریح یہی ہوسکتی ہے کہ الیکشن 90دن میں ہونا چاہئیں، وکلاء برادری کے کچھ بڑے اپنی ذاتی خفت مٹانے کیلئے سپریم کورٹ کو محاذ آرائی میں لارہے ہیں ،ن لیگ ہو یا پی ٹی آئی سب احسان فراموش لوگ ہیں، یہ سب جنرل باجوہ کے فیڈر سے دودھ پی کر جوان ہوئے ہیں، اعظم نذیر تارڑ کے بیان سے ثابت ہوگیا کہ اس وقت جنرل باجوہ اور عدلیہ کے برسرمسند لوگ ایک صفحہ پر تھے، احسن بھون کا کہنا تھا کہ اعتزاز احسن نے منتخب نمائندوں سے ہٹ کر چار وکیل جمع کیے اور گول مول کانفرنس کرلی، چیف جسٹس تمام جج صاحبان کو اکٹھے بٹھا کر معاملات حل کریں، ہم نے ہڑتال نہیں کی یوم سیاہ منایا ۔ فیصل چوہدری نے کہا کہ آئین کے تحت 90دن میں الیکشن ہونا ضروری ہے، سپریم کورٹ کے فیصلے پر ملی بھگت سے عملدرآمد رکوایا گیا،حکمراں اتحاد الیکشن رکوانے کیلئے جو کررہا ہے اتنی ان کی ہمت نہیں ۔