طور خم روڈ پر لینڈ سلائیڈنگ ، کئی مال بردار گاڑیاں ملبے تلے دب گئیں ، 6 افراد جاں بحق

لنڈی کوتل( نمائندہ جنگ ) پاک افغان بارڈرطورخم میں لینڈ سلائڈنگ سے 6افرادجاں بحق اور 8زخمی ہو گئے، درجنوں گاڑیاں ملبے تلے دب گئیں۔ آ پریشن میں 12افرادکوزندہ نکا ل دیا گیا ، آرمی کی ہیوی مشینری پہنچ ملبہ ہٹانے کا کام شروع کردیا گیا،جو آخری اطلاعات تک جاری تھا ۔ واقعہ گزشتہ پیر اور منگل کے درمیانی شب رات کے 2بجے اس وقت پیش آیا تھا جب طورخم ٹرمینل کے بائیں جانب شاہراہ کی توسیع میں این ایل سی حکام پہاڑ میں بلاسٹنگ کر رہاتھا چونکہ گزشتہ رات بار ش بھی ہوئی جس کی وجہ سے پہاڑ کا ایک بڑا تودہ گرنے لگا اور درجنوں گاڑیوں کو اپنی لپیٹ میں لے لیا۔ پاک فوج کی ہیوی مشینری پہنچ کر ملبہ ہٹانے کا کام شروع کیا۔جے یو آئی کے رضاکار انصار الا سلام ضلعی سالار ذاکر اللہ کی قیادت میں ریسکیو آپریشن میں حصہ لے رہے ہیں۔ واقعہ کی اطلاع ملتے ہی مقامی لوگوں نے طورخم کا رخ کر لیا ۔1122اور پاک آرمی کے جوان بھی جائے وقوعہ پر پہنچ گئے جنہوں نے ریسکیو کا کام شروع کیا تاہم ہیوی مشینری نہ ہونے کی وجہ سے ریسکیو آپریشن میں رکاوٹ پیش آیا ،زخمیوں کو لنڈ ی کو تل اسپتال منتقل کیا گیا ہے۔