زرتاج گل انکےخاوند ترقیاتی منصوبوں میں بدعنوانی کی انکوائری کیلئےآج دوبارہ اینٹی کرپشن طلب

لاہور (نمائندہ جنگ)محکمہ اینٹی کرپشن پنجاب نے سابق وفاقی وزیر زرتاج گل ، ان کے خاوند اور دیگر افراد کو آج صبح 10بجے دوبارہ طلب کیاہے۔ زرتاج گل 10اپریل کوپیش نہیں ہوئی تھیں۔اینٹی کرپشن کے مطابق زرتاج گل پر الزام ہے کہ انہوں نے اپنے حلقہ میں پبلک ہیلتھ انجینئرنگ کے مختلف منصوبوں کے ٹھیکے اپنے فرنٹ مینوں کو مارکیٹ سے کم ریٹ پردیئے۔زرتاج گل اور ان کے خاوند ہمایوں رضا اخوند نے پبلک ہیلتھ انجینئرنگ کے ان منصوبوں کو ریوائزکروایا اور ان کی لاگت دوگنا کرائی اور سرکاری خزانے کو کروڑوں کا ٹیکہ لگایا۔اینٹی کرپشن کے مطابق زرتاج گل نے تمام منصوبوں میں بھاری رشوت وصول کی۔زرتاج گل نے منظورشدہ منصوبوں کے پلان میں ازخود تبدیلی کرکے اپنے گھر اور سیکرٹریٹ کو پختہ سڑک سے منسلک کیا۔ناقص میٹریل کی وجہ سے کام مکمل ہونے سے پہلے ہی گلیاں ٹوٹ پھوٹ کا شکار ہوگئیں۔