حماس کے سربراہ اسماعیل ہنیہ عمرہ ادا کرنےسعودی عرب پہنچ گئے

19 اپریل ، 2023

کراچی(نیوزڈیسک)اسماعیل ہنیہ سوموار کو ایک ایسے موقعے پر سعودی عرب پہنچے ہیں جب فلسطینی صدر محمود عباس بھی سعودی عرب میں موجود ہیں۔حماس کے سیاسی شعبے کے سربراہ اسماعیل ہنیہ کئی برسوں بعد سعودی عرب کے دورے پر مکہ پہنچ چکے ہیں۔سوشل میڈیا پر گردش کرتی ویڈیوز میں انہیں سعودی عرب کے شہر مکہ میں عمرہ ادا کرتے ہوئے دیکھا جا سکتا ہے۔ترک خبر رساں ادارے انادولو کے مطابق اسماعیل ہنیہ کے وفد میں حماس کے سابق سیاسی سربراہ خالد مشعل بھی شریک ہیں۔اسماعیل ہنیہ سوموار کو ایک ایسے موقعے پر سعودی عرب پہنچے ہیں جب فلسطینی صدر محمود عباس بھی سعودی عرب میں موجود ہیں۔انادولو کے مطابق محمود عباس بھی گذشتہ روز سعودی عرب پہنچے تھے۔اس سے قبل خالد مشعل نے بطور حماس کے اعلی ترین عہدیدار کے 2015 میں سعودی عرب کا دورہ کیا تھا۔ایرانی خبر رساں ادارے پریس ٹی وی نے بھی حماس کے رہنما کے دورہ سعودی عرب کی خبر دی ہے۔ابھی تک یہ واضح نہیں ہے کہ کیا سعودی عرب میں اسماعیل ہنیہ اور محمود عباس کے درمیان بھی ملاقات ہو گی یا نہیں۔