5 مئی سے لاہور میں برج چیمپیئن شپ، بھارتی ٹیم شرکت کرے گی

لاہور(خالدمحمودخالد) 5مئی سے لاہور میں ہونے والی22 ویں ایشیا اینڈ مڈل ایسٹ برج چیمپیئن شپ میں بھارتی ٹیم بھی شرکت کرے گی۔ نئی دہلی میں پاکستانی ہائی کمیشن کے ذرائع کے مطابق جمعہ کے روز 30 بھارتی کھلاڑیوں کو پاکستان کا ویزہ جاری کردیاگیا ہے۔ تمام کھلاڑی 4 مئی کو واہگہ بارڈر کے راستے لاہور پہنچیں گے۔ بھارت کے علاوہ یو اے ای، بنگلا دیش، فلسطین اور اردن کی ٹیمیں بھی پاکستان پہنچ رہی ہیں۔ پاکستان برج فیڈریشن کے صدر ایم لقمان نے جنگ سے بات کرتے ہوئے بتایا کہ یہ پہلا موقعہ ہے کہ برج چیمپیئن شپ لاہور میں منعقد ہورہی ہے اور اس میں بھارتی ٹیم بھی شرکت کرے گی۔ اس سے قبل اردن، دبئی اور بھارت برج چیمپیئن شپ کروانے کا اعزاز حاصل کرچکے ہیں۔ انہوں نے بتایا کہ پاکستان میں 12 سال بعد یہ چیمپیئن شپ منعقد کی جارہی ہے۔ واضح رہے کہ برج کارڈز کی صورت میں اولمپکس میں کھیلی جانیوالی واحد گیم ہے۔ مبشر نے مزید بتایا کہ چیمپیئن شپ میں شامل ہونیوالی ٹیموں کی سکیورٹی کیلئے پنجاب حکومت کی طرف سے خصوصی انتظامات کئے جارہے ہیں۔