بائیڈن نے ایرانی اور روسی سیکورٹی ایجنسیوں پر پابندیاں لگا دیں

واشنگٹن (اے پی پی) امریکا کے صدر جو بائیڈن نےروسی فیڈرل سکیورٹی سروس (ایف ایس بی) اور ایران کی اسلامی انقلابی گارڈ کور (آئی آر جی سی) کے انٹیلی جنس ونگ کے خلاف نئی پابندیوں کا اعلان کیا ہے۔امریکی نشریاتی ادارے کے مطابق امریکی انتظامیہ کے ایک اعلیٰ عہدیدار نے میڈیا کو بتایا کہ روس اور ایران کے ان اداروں نے امریکیوں کو سیاسی فائدہ حاصل کرنے یا امریکا سے رعایتیں حاصل کرنے کے لیے استعمال کرنے کی کوشش کی ہے۔انہوں نے بتایا کہ ان دو اداروں کے علاوہ امریکا نے اسلامی انقلابی گارڈ کور انٹیلی جنس آرگنائزیشن کی چار اہم شخصیات سربراہ محمد کاظمی، شریک نائب سربراہان مہدی سیاری اور حسن مغیغی اور نائب سربراہ روح اللہ بزغندی پر بھی پابندیاں عائد کی ہیں۔انہوں نے روسی فیڈرل سیکورٹی سروس کے حوالے سے بتایا کہ یہ روس میں غلط طریقے سے حراست میں لیے گئے امریکی شہریوں کی گرفتاری، تفتیش اور حراست میں بارہا ملوث رہی ہے۔