PTI ٹکٹ دلوانے پر120 لاکھ کی ڈیل، ثاقب نثار کے بیٹے کی مبینہ آڈیو لیگ، بیٹے کی آواز کو توڑ مروڑ کر پیش کیاگیا، سابق چیف جسٹس

لاہور، اسلام آباد (نمائندہ جنگ، مانیٹرنگ ڈیسک، ایجنسیاں) سپریم کورٹ کے سابق چیف جسٹس ثاقب نثار کے بیٹے کیPTI ٹکٹ دلوانے پر 120لاکھ کی ڈیل کی مبینہ آڈیوز منظر عام پر آ گئیں۔لیک ہونے والی مبینہ آڈیوز میں تحریک انصاف کے ٹکٹوں کی کروڑوں روپے میں فروخت سے متعلق گفتگو سنی جا سکتی ہے، ثاقب نثار کے بیٹے نجم ثاقب ایڈووکیٹ کی دو مبینہ آڈیوز سوشل میڈیا پر وائرل ہوگئیں، دونوں آڈیوز کا مجموعی دورانیہ 2 منٹ 18 سیکنڈ ہے،دوسری جانب سابق چیف جسٹس ثاقب نثار نے کہا ہے کہ بیٹے کی آواز کو توڑ مروڑ کر پیش کیا گیا، آڈیو ایڈٹ شدہ ہیں ، مختلف حصوں کو جوڑ کر بنایا گیا ، لیک کرنے والوں پر لعنت بھیجتا ہوں ،چینل نے میرے مؤقف کو صحیح پیش نہیں کیا گیا۔ تفصیلات کے مطابق سابق چیف جسٹس ثاقب نثار کے بیٹے نجم ثاقب کی مبینہ پہلی آڈیو میں وہ پی ٹی آئی کے پی پی 137 کے ٹکٹ کے امیدار ابوذر چدھڑ سے مبینہ گفتگو کر رہے ہیں، ابوزر چدھڑ نے کہا کہ سر اسلام و علیکم،نجم ثاقب کہتے ہیں کہ جی،ابوذر چدھڑ نے کہا کہ آپ کی جدوجہد رنگ لے آئی،نجم ثاقب کہتے ہیں کہ مجھے پتہ چل گیا ہے،ابوذر چدھڑ نے کہا کہ اچھا سر،نجم ثاقب کہتے ہیں کہ اب بتائیں اب کرنا کیا ہے؟ابوذر چدھڑ نے کہا کہ ابھی ٹکٹ چھپوا رہے ہیں ناں، چھاپ دیں اس میں دیر نہ کریں ٹائم تھوڑا ہے، نجم ثاقب نے کہا کہ بس بابا کو ملنے آجانا شکریہ ادا کرنے کے لیے اور کچھ نہیں، ابوذر چدھڑ کہتا ہے بالکل بالکل، کیسی بات کر رہے ہیں،نجم ثاقب نے کہا کہ گیارہ بجے تک واپس آجائیں گے ان کو جپھی ڈالنے آجانا بس، انہوں نے بہت محنت کی، بہت محنت کی ہے، ابوذر چدھڑ نے کہا کہ بہت زیادہ کی ہے، اچھا میں سوچ رہا تھا پہلے انکل کے پاس آؤں یا شام کو ٹکٹ جمع کرا کر آؤں، نجم ثاقب نے جواب دیا کہ وہ مرضی ہے تیری، لیکن آج کے دن میں مل ضرور لینا بابا کو،ابوذر چدھڑ نے کہا کہ ہاں بالکل سیدھا ہی انکے پاس آنا ہے،نجم ثاقب نے کہا کہ بس ٹھیک ہے،ابوذر چدھڑ نے کہا کہ 12 بجے ٹائم ختم ہو جانا ہے،نجم ثاقب نے کہا کہ ٹکٹ چھپوائیں، تصویر بھیجیں اور پھر وہ کر کے آئیں،ابوذر چدھڑ نے کہا کہ او کے، دوسری آڈیو میں نجم ثاقب نے میاں عزیر سے کہا واٹس ایپ دیکھو،میاں عزیر نے سوال کیا کہ ہاں یہ ابوذر نے بھیج ہے تمہیں؟نجم ثاقب نے کہا کہ یار میں بھی وکیل ہوں، میاں عزیر نے کہا کہ نہیں یہ، ابوذر نے بھیجی ہے تمیں یا ڈائریکٹ آئی ہے؟ نجم ثاقب نے جواب دیا کہ مجھے ڈائریکٹ بھی آسکتی ہے ضروری تو نہیں ابوذر ہی بھیجے ہر چیز،میاں عزیر نے کہا کہ اس کے اوپر سے آؤں؟ نجم ثاقب کا کہنا ہے کہ آنا ہے تو آ جاؤ ویسے مجھے تو اسی نے بھیجی ہے،میاں عزیر نے کہا کہ اچھا، نجم ثاقب نے کہا کہ تو کام کس نے کرایا ہے؟ کسی اور نے تو نہیں کرایا،میاں عزیر نے کہا کہ بس گڈ ہو گیا ہے،نجم ثاقب نے سوال کیا کہ تو کیا سین ہے؟میاں عزیر نے کہا کہ کر لیتا ہوں بات ناں، اوکے،اوکے،نجم ثاقب نے کہا کہ کیا مطلب بات کر لیتا ہوں، ڈیسائیڈڈ تھا،میاں عزیز نے کہا کہ فون کر کے بات کر لوں کہ بھیج دو سامان مجھے، بھائی جان زبان ہوئی ہے میں کوئی ۔ نہیں ہوں۔ نجم ثاقب نے کہا کہ سامان بھیجوں نہیں ایک بیس سے نیچے نہیں لینا ورنہ میں تمہاری ٹانگیں توڑ دوں گا،میاں عزیر کہتا ہے کہ تم پھر فون پر ایسی باتیں کررہے ہو،نجم ثاقب کہا ہے میرے لئے اتنا ایشو نہیں ہے لیکن ایک بیس سے نیچے نہ لینا اس سے، نجم ثاقب کہتا ہے میں بتا رہا ہوں میں مزاق نہیں کررہا ہوں یہ بہت بڑی چیز ہے عزیر، میاں عزیر کہتا ہے کہ بھائی جان زبان ہوئی ہے، میں کوئی ۔۔۔تو نہیں ہوں، نجم ثاقب کہتا ہے کہ تم ۔ ہوجاؤ، میرے لیے ۔ ہو جاؤ، ورنہ میں تم سے بات ہی نہیں کروں گا، چلو او کے میں کرتا ہوں، میں ورنہ ڈائریکٹ ہو جاؤں گا اور تو کچھ نہیں کر سکتا،میاں عزیر نے کہا کہ کہہ دو یہ زیادہ بہتر ہے،نجم ثاقب کہتے ہیں کہ وہ دفتر آرہا ہے میرے پاس، جمع کرا کے میرے پاس، تم نے آنا ہے تو تم بھی آجاؤ،میاں عزیر نے کہا کہ اوکے۔ دریں اثنا سابق چیف جسٹس پاکستان ثاقب نثار نے اپنے بیٹے نجم ثاقب کی آڈیو کو ایڈٹ شدہ قرار دے دیا،انھوں نے کہا آڈیو مختلف حصوں کو جوڑ کر بنائی گئی ہے، مجھ سے ایک چینل نے رابطہ کیا لیکن میرے موقف کو توڑ مروڑ کر پیش کر رہا ہے، میرے بیٹے کی کیا پرائیویٹ زندگی نہیں ہے، میرا بیٹا اس ملک کا رہائشی ہے کیا وہ کسی سے دوستی بھی نہیں کر سکتا ہے ، جنہوں نے آڈیو کو توڑ مروڑ کر بنایا اور لیک کی ان پر لعنت بھیجتا ہوں۔