چھوٹے تاجروں کو ریلیف فراہم کیا جائے، اسٹیٹ ایجنٹس ایسو سی ایشن

اسلام آباد(نیوز رپورٹر)اسلام آباد اسٹیٹ ایجنٹس ایسو سی ایشن کے چیف آرگنائزر رانا قیصر نے کہا ہے کہ کاروباروں کے تحفظ کیلئے جامع حکمت عملی مرتب کی جائے، مہنگائی کی شرح کو کم کرنے کیلئے کاروبار ی طبقے بالخصوص چھوٹے تاجروں کو ریلیف فراہم کیا جائے ۔بیروزگاری اور مہنگائی کی رفتار کے مقابلے میں آمدن نہ بڑھنے کی وجہ سے لوگوں کی قوت خرید میں کمی ہو رہی ہے اور جس کے کاروبار پر منفی اثرات مرتب ہو رہے ہیں ۔انہوں نے کہا کہ پیٹرولیم اور یوٹیلٹی بلز کی قیمتوں کو نیچے لا کر ایک سطح پر منجمد کرنے کیلئے اقدامات کئے جائیں اورحکومت مصنوعی مہنگائی پیدا کرنے کے ذمہ داروں کے خلاف بلا تفریق کارروائی کرے۔حکومت چھوٹے کاروباروں کی ترقی کے لئے جامع پالیسی بنائے ملک بھر میں لاکھوں تاجر ملک کی ایک بڑی آبادی کوروزگار کی فراہمی کا ذریعہ ہیں اور اس کے ساتھ ساتھ اربوں روپے کے ٹیکسز کی ادائیگی بھی کر رہے ہیں۔مہنگائی کی شرح میں کمی کی بجائے اضافہ ہونا تشویش کا باعث ہے ،ہمارا مطالبہ ہے کہ حکومت پیٹرولیم اور یوٹیلٹی بلز کی قیمتوں کو نیچے لا کر ایک سطح پر منجمد کرے اور ٹیکسز کی شرح میں بھی کمی کی جائے۔