پاکستان میں خواتین بیس بال کابے پناہ ٹیلنٹ ہے ،شازیہ جاوید

راولپنڈی(سپورٹس رپورٹر)پاکستان میں خواتین بیس بال کابے پناہ ٹیلنٹ ہے ، حکومت توجہ دے ،سپانسرز تعاون کریں اوربیس بال کے گرائونڈز بنائے جائیں تو پاکستان ویمن بیس بال ٹیم دنیا بھر میں سبزہلالی پرچم سربلند کرسکتی ہے، ان خیالات کااظہار پاکستان جونیئرٹیم اور خاورشاہ نیشنل ویمن بیس بال اکیڈمی کی کپتان شازیہ جاوید نے یہاں میڈیا سے گفتگو کرتے ہوئے کیا۔ انہوں نے کہاکہ پاکستان فیڈریشن بیس بال کے صدر سید فخرعلی شاہ کی کوششوں سے یہ کھیل پاکستان میں تیزی سے مقبولیت کی منازل طے کررہاہے اورگرین شرٹس نے ملائشیا کی قومی خواتین ٹیم کو ہوم سیریز میں 3-0سے شکست دی جبکہ ہماری جونیئر ٹیم کی کارکردگی بھی شانداررہی ۔ انہوں نے سپانسرز سے تعاون کی اپیل کرتے ہوئے کہاہے کہ پاکستان میں ویمن بیس بال کاایک بھی گرائونڈ نہیں ہے ،اگر ہمیں راولپنڈی، اسلام آباد اورلاہور سمیت بڑے شہروں میں ایک ایک بیس بال گرائونڈ مل جائے اور انٹرنیشنل ٹورز کیلئے سپانسرز تعاون کریں تو پاکستان ویمن بیس بال ٹیم بہت جلد اپنی عالمی رینکنگ بہتر بناسکتی ہے۔ انہوں نے کہاکہ خاورشاہ نیشنل ویمن بیس بال اکیڈمی کے صدر ڈاکٹرزاہدراولپنڈی اسلام آباد میں ویمن بیس بال گرائونڈ کوشاں ہیں جس کیلئے چیف کمشنر وچیئرمین سی ڈی اے نورالامین مینگل ، کمشنرراولپنڈی لیاقت علی چٹھہ ،ڈی سی راولپنڈی ڈاکٹرحسن وقارچیمہ دیگر انتظامیہ کو قومی مقصد کے حصول کیلئے بھرپور سرپرستی کرنی چاہئے۔