آئی سی سی فورتھ امپائر کی غلطی، دوسرا ون ڈے میچ 7؍منٹ روکنا پڑا

راولپنڈی(سپورٹس رپورٹر)آئی سی سی فورتھ امپائر کی غلطی کی وجہ سے پاکستان اور نیوزی لینڈ کا دوسرا ون ڈے انٹر نیشنل دوسرے اوور میں سات منٹ رکا رہا۔امپائر علیم ڈار کو دوسرے اوور میں احساس ہوا کہ میچ کی پچ تبدیل کردی گئی لیکن 30 گز کا سرکل تبدیل نہیں کیا گیا۔پاکستان کی جانب سے پہلا اوور گزشتہ میچ کے سرکل کی پیمائش کے ساتھ کرادیاگیا۔دوسرے اوور میں امپائر علیم ڈار نے سرکل کی پیمائش کی درستی کی اور انہوں نے قدموں سے سرکل کو ناپ کر درست کیاگیا۔ذرائع کا کہنا ہے کہ میچ سے قبل امپائروں اور میچ ریفری کو سرکل کے لئے تیس گز کے دائرے کی پیمائش کرنا پڑتی ہے لیکن فورتھ امپائر آصف یعقوب نے چیک کرنے سے گریز کیا۔