پرویز الہٰی کے گھر پر ایکشن سے وفاق کا تعلق نہیں ، پنجاب حکومت کی کارروائی ہے، اسحاق ڈار کا شاہ محمود سے رابطہ

اسلام آباد (نیوز ایجنسی) وفاقی وزیر خزانہ اسحاق ڈار نے تحریک انصاف کے وائس چیئرمین اور مذاکراتی ٹیم کے سربراہ شاہ محمود قریشی سے رابطہ کرکے چوہدری پرویز الٰہی کے گھر پولیس کے حملے پر افسوس کا اظہار کیا ہے، اسحاق ڈار کا کہنا ہے کہ پرویز الٰہی کے گھر پر ایکشن سے وفاق کا تعلق نہیں، یہ نگران پنجاب حکومت کی کارروائی ہے۔ نجی ٹی وی کے مطابق وزیر خزانہ اسحاق ڈار وائس چیئرمین پی ٹی آئی شاہ محمود قریشی سے رابطہ کرکے تحریک انصاف کے صدر چوہدری پرویز الٰہی کے گھر پر دھاوے ، چادر اور چار دیواری کی پامالی پر افسوس کا اظہار کیا۔ انہوں نے کہا کہ تحریک انصاف کے جذبات سے اپنی قیادت کو آگاہ کریں گے، اس سلسلے میں جلد تحریک انصاف سے دوبارہ رابطہ کریں گے۔شاہ محمود قریشی نے وزیر خزانہ اسحاق ڈار کو چوہدری پرویز الٰہی کے گھر پر غیرقانونی حملے پر تحریک انصاف اور چوہدری پرویز الٰہی کے خاندان کے جذبات سے آگاہ کیا۔