دفاترکے اندرا ورباہر کوئی ایجنٹ نظرنہ آئے،ڈی جی ایکسائز

لاہور (نیوزرپورٹر)ڈائریکٹر جنرل ایکسائز ٹیکسیشن و نارکوٹکس کنٹرول پنجاب محمد علی نے کہا ہے کہ ایکسائز دفاتر سے ٹاؤٹ مافیا کا خاتمہ میری اولیں ترجیح ہے جس کے لیے پہلے دن سے صوبہ بھر میں دفاتر کے اچانک دورے کر رہا ہوں۔ محکمہ ایکسائز کے فرید کوٹ آفس کا اچانک دورہ کرتے ہوئے انہوں نے افسران کو ہدایت کی کہ ایکسائز دفاتر کے اندر اور باہر مجھے کوئی ایجنٹ نظر نہ آئے۔ ڈی جی نے پراپرٹی ٹیکس اور موٹر وہیکل برانچ کے مختلف حصوں کا معائنہ کرتے ہوئے یہ بھی تاکید کی کہ پراپرٹی ٹیکس، گاڑیوں کی رجسٹریشن اور ٹرانسفر وغیرہ کے زیر التواء کیس جلد نمٹائے جائیں۔ لہٰذا اگر کوئی شکائت درست پائی گئی تو متعلقہ ای ٹی او اور انسپکٹر کے خلاف سخت کارروائی کی جائے گی ۔ ڈی جی نے کہاکہ زیر التوا سمارٹ کارڈز کا بیک لاگ جلد ختم کیاجائے اور شہریوں کو محکمانہ خدمات کی فراہمی ہر ممکن آسان بنائی جائے۔ انہوں نے اس موقع پر بات چیت کرتے ہوئے کہا کہ پراپرٹی ٹیکس کی سیلف اسسمنٹ کا نظام جلد متعارف کرا رہے ہیں جس سے انسپکٹرز کی بے ضابطگیوں کا خاتمہ ہوگا۔