نیو یارک سے منشیات سیالکوٹ سمگل کرنے کی کوشش ناکام

لاہور (نیوزرپورٹر)اینٹی نارکوٹکس فورس (اے این ایف) نے جی پی او سیالکوٹ میں کارروائی کرکے نیو یارک سے بھیجاگیا منشیات کا پارسل قبضے میں لے لیا۔اے این ایف کی جانب سے منشیات کے خلاف مختلف شہروں میں کریک ڈاون کیا گیا۔ اس دوران جی پی او سیالکوٹ میں نیو یارک سے آئے پارسل سے 160 گرام منشیات برآمد کی گئیں۔ایک اور کارروائی کے نتیجے میں اسلام آباد ٹول پلازہ پر مسافر بس میں سوار خاتون سمیت 2 ملزمان کو گرفتار کیا گیا۔ شہری سے 5 کلو جبکہ خاتون سے 4 کلو منشیات برآمد کی گئیں۔ اسی طرح اے این ایف کی طرف سے پشاور میں ہشتنگری چوک پر چارسدہ کے رہائشی ملزم سے 500 نشہ آور گولیاں برآمد کی گئیں۔دوسری طرف کوئٹہ چلتن مارکیٹ میں نجی کوریئر آفس میں بک کئے گئے پارسل سے بھی منشیات برآمد کی گئیں۔ تحقیقات کے بعد حکام نے کوئٹہ کلب روڈ سے ملزم کو گرفتار کرکے مقدمہ درج کرلیا۔