سپریم کورٹ کے جسٹس مظاہر نقوی کیخلاف سندھ بار کونسل نے ریفرنس دائر کردیا

اسلام آباد(صباح نیوز) سندھ بار کونسل نے بھی سپریم کورٹ کے جسٹس مظاہر نقوی کے خلاف مس کنڈکٹ کے الزامات کی تحقیقات کے لئے سپریم جوڈیشل کونسل میں درخواست دائر کردی۔ سندھ بار کونسل نے الزام عائد کیا کہ سید مظاہر علی اکبر نقوی کے افعال نے نہ صرف سپریم کورٹ کے وقار کو مجروح کیا بلکہ اس ساکھ کو بھی ٹھیس پہنچائی۔ شکایت گزار کا خیال تھا کہ کوڈ آف کنڈکٹ کی مبینہ خلاف ورزی جج کو ان کے عہدے سے ہٹانے کے لیے کافی ہے۔ سپریم کورٹ کے مذکورہ جج کے خلاف گزشتہ چند ماہ کے دوران تقریبا نصف درجن شکایات دائر کی جاچکی ہیں۔ سندھ اور خیبرپختونخوا بار کونسلز کے علاوہ پاکستان بار کونسل، لاہور سے تعلق رکھنے والے سوشل ایکٹیوسٹ میاں داد ، وکلا فورم مسلم لیگ(ن)اور ایک شہری غلام مرتضی خان نے بھی جسٹس مظاہر علی اکبر نقوی کے خلاف مس کنڈکٹ اور آمدن سے زائد اثاثوں کی شکایات درج کرائی تھیں۔