وزیر اعظم کی وفاقی وزیر خرم دستگیر کو موسم گرما میں بجلی کی ترسیل میں نمایاں بہتری کیلئے موثر اقدامات کرنے کی ہدایت رائو اجمل اور عرفان ڈوگر کی بھی ملاقاتیں

لاہور، اسلام آباد(خصوصی نمائندہ،اپنے نامہ نگار سے،این این آئی، اے پی پی )وزیراعظم شہباز شریف سے وفاقی وزیر برائے پاور ڈویژن انجینئرخرم دستگیر نے لاہور میں ملاقات کی ۔ملاقات میں وزیراعظم شہباز شریف کو پاور سیکٹر میں جاری ترقیاتی منصوبوں کے بارے میں بریف کیا گیا۔ وزیر اعظم شہباز شریف نے ہدایت کی کہ موسم گرما میں بجلی کی ترسیل میں نمایاں بہتری کے لیے موثر اقدامات کئے جائیں۔ بجلی کی ترسیل کے لئے نئی ٹرانسمیشن لائنز پر جاری کام جلد از جلد مکمل کیا جائے تاکہ اس موسم گرما میں بجلی کے صارفین کو ہر ممکن سہولت پہنچائی جا سکے۔وزیراعظم محمد شہباز شریف سے ممبران قومی اسمبلی رائو محمد اجمل اور عرفان ڈوگر نے بھی الگ الگ ملاقات کی ہے۔ملاقات میں حلقہ سے متعلقہ معاملات اور سیاسی صورتحال پر تبادلہ خیال کیا گیا۔