آپکے باباپرفخرہے، آرمی چیف کی سپاہی عمران شہید کی بیٹی سے ملاقات

26 مئی ، 2023

اسلام آباد ( وقائع نگار)آرمی چیف نے سپاہی عمران شہید کی بیٹی سے ملاقات کی اور کہا کہ قوم کوآپکے باباپرفخرہے، شہدا کی قربانیاں فراموش نہیں ہونے دینگے،بچے مستقبل کے معمار ہیں،پاک فوج کے سربراہ جنرل سید عاصم منیر نے یومِ تکریمِ شہداءِ پاکستان کےموقع پر سپاہی عمران شہید کی بیٹی عذرا سے ملاقات کی ، کچھ دن قبل سپاہی عمران شہید کی بیٹی کے ویڈیو بیان نے پوری قوم کو اشکبار کر دیاتھا سپاہی عمران شہید نے 12 اپریل 2022 میں انگور اڈہ وزیرستان میں وطنِ عزیز کی خاطر اپنا خون خاکِ ارضِ پاک میں شامل کیا سپاہی عمران شہید کا تعلق ڈیرہ مراد جمالی بلوچستان سے ہے شہید نے ورثا میں بیوہ اور پانچ بچے چھوڑے ہیں ،شہید کی بیٹی نے اپنے پیغام میں 9 مئی یومِ سیاہ کے افسوسناک واقعات کی مذمت کی تھی عسکری زرائع کے مطابق آرمی چیف نے شہید کی بیٹی کو آج جی ایچ کیو کی تقریب میں خصوصی طور پر مدعو کیا آرمی چیف نے انتہائی شفقت اور پیار سے قوم کی بیٹی کو یقین دلایا کہ شہدا کی قربانیوں کو ہر گز فراموش نہیں ہونے دینگے، ہر مشکل میں پاک فوج ہمیشہ آپ کیساتھ کھڑی رہے گی ہماری نوجوان نسل خاص کر بچے ملک کے مستقبل کا معمار ہیں پاک فوج آنیوالی نسلوں کیلئے ملک میں امن و سلامتی کے قیام کی خاطر ہمیشہ اپنی کوششیں جاری رکھے گی، آرمی چیف نے معصوم بچی سے کہا کہ پوری قوم کو آپکے بابا سپاہی عمران شہید پر ناز ہے اور ملک و قوم کے تمام شہدا ہمارے لئے باعثِ فخر ہیں۔