عمران،بشریٰ سمیت 600 پی ٹی آئی رہنما نو فلائی لسٹ میں شامل

اسلام آباد(جنگ نیوز)سابق وزیراعظم عمران خان ،انکی اہلیہ بشریٰ بی بی سمیت پی ٹی آئی کے 600 سے زائد رہنماؤں اور سابق ارکان اسمبلی کے نام نو فلائی لسٹ میں شامل کرلئے گئے ہیں۔ ذرائع ایف آئی اے کا کہنا ہےکہ بیرون ممالک جانے سے روکنےکیلئے پی ٹی آئی رہنماؤں کے نام ایف آئی اے کی پروونشل نیشنل آئیڈینٹیفکیشن لسٹ ( پی این آئی ایل) میں ڈالےگئے ہیں۔مرادسعید، ملیکہ بخاری، فواد چوہدری، حماد اظہر، قاسم سوری ، اسد قیصر، یاسمین راشد اور میاں اسلم اقبال کا نام بھی نو فلائی لسٹ میں شامل کیا گیا ہے۔ ذرائع کا دعویٰ ہےکہ گزشتہ 3 روز میں بعض عہدیداروں نے بیرون ممالک جانےکی کوشش بھی کی، بیرون ممالک جانےکی کوشش کرنے والے پی ٹی آئی ارکان اور عہدیداروں کو ہوائی اڈوں پر روکا گیا، انکو بیرون ممالک سفر سے روکنےکیلئے نام پولیس، سی ٹی ڈی اور خفیہ اداروں نے ارسال کئے تھے۔