کراچی ( اسٹاف رپورٹر) متحدہ عرب امارات کراچی کے قونصل جنرل بخیت عتیق الرحمتی(Bakheet Ateeq AlRemeithi )نے کہا ہے کہ کراچی میں متحدہ عرب امارات کا قونصل خانہ کراچی کے تاجروں کو ایک دن میں ویزے کا اجرا ء کرے گا ،یہ بات انھوں نے جمعرات کو فیڈریشن ہاوس کے دورے کے موقع پر قائم مقام صدر ایف پی سی سی آئی سلیمان چاؤلہ اور دیگر سے بات چیت میں کیا ،سلیمان چاولہ نے متحدہ عرب امارات کے کراچی قونصل خانے میں اس کے ایشیاء کے سب سے بڑے ویزا سینٹر کے افتتاح اور آپریشنل ہونے کا خیرمقدم کیا ہے اور اسے دونوں برادر ممالک کے درمیان پیپل ٹو پیپل اور بزنس ٹو بزنس تعلقات کو فروغ دینے میں ایک اہم سنگ میل قرار دیا۔ سلیمان چاؤلہ نے کہا کہ یہ اقدام پاکستانی تاجروں، صنعتکاروں، سرمایہ کاروں، برآمد کنندگان، سیاحوں اور طلباء کو کاروبار اور ٹورازم کے لیے اپنی ترجیحی منزل کے طور پر متحدہ عرب امارات کی مختلف ریاستوں کا انتخاب کرنے کی ترغیب دینے کے لیے مہمیز کا کام دے گا۔