ذاتی انتقام نہیں قدرت کے انتقام پر یقین رکھتے ہیں،مریم نواز

لاہور( نمائندہ جنگ ) مسلم لیگ ن کی سینئر نائب صدر و چیف آرگنائزر مریم نواز نے کہا ذاتی انتقام نہیں قدرت کے انتقام پر یقین رکھتے ہیں،میں اور نواز شریف بدلے پر یقین نہیں رکھتے، جو ہو رہا ہے یہ قدرت کا نظام انصاف ہے،عمران خان کے سیاسی گناہ انکا تعاقب کر رہے ہیں ،اس طرح کا انصاف انسانیت کیلئے سبق آموز ہے،شہیدوں کا لہو کسی فرد کا نہیں، قوم کا قرض ہوتا ہے ،جو اسکی بے قدری کرے وہ صرف غدار ہوتا ہے،مائیکرو بلاگنگ ویب سائٹ پر جاری اپنے بیان میں انہوں نے عمران خان کے اس موقف کو رد کیا ،جس میں انہوں نے کہا تھا کہ اس وقت جو ہو رہا ہے وہ مریم نواز کو موقع فراہم کیا جا رہا ہے کہ وہ اسٹیبلشمنٹ کے ذریعے جو انکے والد نواز شریف کو اقتدار سے بے دخل کیا گیا تھا تو اس بدلہ لے سکیں۔مریم نواز نے کہا کہ وہ بدلے پر یقین نہیں رکھتیں، انکے مطابق اب عمران خان کے سیاسی گناہ انکا تعاقب کر رہے ہیں ،انہوں نے یہ تسلیم کر لیا کہ نواز شریف کیخلاف انہوں نے خوامخواہ کا محاذ کھول رکھا تھا ،خاص طور انہیں وزارت عظمی کے منصب سے ہٹانے کیلئے عمران خان آلہ کار بنے۔