سینٹ قائمہ کمیٹی دفاع‘ افواج پاکستان سے اظہار یکجہتی کی قرارداد منظور

اسلام آباد (پرویز شوکت، وقائع نگار) سینیٹ کی قائمہ کمیٹی برائے دفاع کا اجلاس چیئرمین کمیٹی سینیٹر مشاہد حسین سید کی زیر صدارت ہوا۔ اجلاس میں ملک کی دفاعی، سکیورٹی اور فلاح و بہود کی صورتحال کا جائزہ لیا گیا۔ اجلاس میں افواج پاکستان سے اظہار یکجہتی کیلئے ایک قرارداد منظور کی گئی منظور کی گئی قرارداد میں 9 مئی کے پُرتشدد واقعات کی شدید مذمت کی گئی۔ قرارداد میں مادرِ وطن کیلئے قربانیاں دینے والے جوانوں اور افسروں کو زبر دست خراج عقیدت پیش کیا اور شہداء کے لواحقین سے دلی ہمدردی کا اظہار کیا گیا۔ اجلاس میں فوج اور سکیورٹی کے شہداء کیلئے فاتحہ خوانی بھی کی گئی۔ اجلاس کے دوران کمیٹی نے متفقہ طور پر ایک قرارداد منظور کی جس میں افواج پاکستان کے ساتھ غیر متزلزل یکجہتی کا اظہار کیا گیا اور 9 مئی کو پیش آنے والے آتش زنی اور توڑ پھوڑ کے افسوسناک واقعات کی مذمت کی گئی۔