نفرت کی سیاست معاشرے کیلئے زہر قاتل ہے‘ چوہدری شجاعت

اسلام آباد (نمائندہ خصوصی) پاکستان مسلم لیگ کے صدر چوہدری شجاعت حسین نے کہا ہے کہ پاکستان شہداء کی قربانیوں کا مقروض، نفرت کی سیاست معاشرے کیلئے زہر قاتل ہے، سب مل کر سیاسی اور معاشی استحکام کیلئے کام کریں۔ ان خیالات کا اظہار انہوں نے پارٹی کے مرکزی سیکرٹری اطلاعات مصطفیٰ ملک سے گفتگو کرتے ہوئے کیا۔ اس موقع پر حافظ عقیل جلیل بھی موجود تھے۔ چوہدری شجاعت حسین نے مصطفیٰ ملک کو پارٹی امور، تنظیم سازی ، سیاسی صورتحال پر مشاورت اور خصوصی ہدایات دیں۔ چوہدری شجاعت نے کہا کہ شہداء ہمارا فخر، وقار مجروح کرنے والے معافی کے مستحق نہیں، پارٹی کی جانب سے پاک فوج سے اظہار یکجہتی کے لئے ملک گیر نکالی جانی والی شاندار ریلیوں پر دلی مسرت ہوئی۔ انہوں نے کہا کہ تمام صوبائی قیادتوں، پارٹی ونگز کے سربراہوں، تنظیمی عہدے داران اور کارکنان کو مبارکباد پیش کرتا ہوں۔ چوہدری شجاعت حسین نے مرکزی چیف آرگنائزر چوہدری محمد سرور کی کارکرگی قابل فخر اور محنت کو بھی خراج تحسین پیش کیا۔ انہوں نے مزید کہا مسلم لیگ کے دروازے ہر ایک کے لئے کھلے ہیں مگر میری ترجیح ہمیشہ نظریاتی اور مخلص کارکن ہی رہیں گے۔