اگلے سال گوادر سے کاشغر تک ریلوے لائن بچھانے کا منصوبہ ہے‘ سینیٹر عبدالقادر

اسلام آباد (نیوز رپورٹر) چیئرمین قائمہ کمیٹی برائے پیٹرولیم و قدرتی وسائل سینیٹر عبدالقادر نے کہا ہے کہ پاک چین اقتصادی راہداری دونوں ممالک کے درمیان دوستی اور اقتصادی ترقی کا عظیم الشان منصوبہ ہے۔ رواں برس اس منصوبے کے دس سال مکمل ہوگئے ہیں۔ منصوبے کی دس سالہ تقریبات کے انعقاد کا فیصلہ کیا گیا ہے۔ اپنے بیان میں انہوں نے کہا کہ پاکستان میں ہونے والی تقریبات میں چینی قیادت اور دانشوروں کو مدعو کیا جائے گا۔ اسی طرح پاکستانی وفود چین جائیں گے۔ ان دس برسوں میں چینی سرمایہ کاری سے پاکستان کی معیشت کے مختلف شعبوں میں کم ترقیاتی منصوبے مکمل کئے گئے اور کئی زیر تکمیل ہیں۔ اگلے سال گوادر سے کاشغر تک ریلوے لائن بچھانے کا منصوبہ ہے۔ اس کے علاوہ کراچی سرکلر ریلوے‘ توانائی‘ زراعت‘ سائنس و ٹیکنالوجی‘ آٹی اور انفراسٹرکچر کے کئی دوسرے منصوبے مکمل کرنے کے ہدف پر بھی کام ہو رہا ہے۔ انہوں نے کہا کہ گوادر جو کبھی ماہی گیروں کا چھوٹا سا گاؤں تھا بین الاقوامی اہمیت کی بہت بڑی بندر گاہ بن چکا ہے۔ جس سے پاکستان اور دنیا کے درمیان کراچی کے علاوہ بھی سمندری راستے کھل گئے ہیں۔ گوادر میں آزاد تجارتی زون کا پہلا مرحلہ مکمل ہونے کے بعد دوسرا مرحلہ زیر تکمیل ہے۔ انہوں نے کہا کہ اس بے مثال منصوبے کو ناکام بنانے اور روکنے کیلئے بھارت نے امریکہ کی مدد سے ایڑی چوٹی کا زور لگایا۔ بیرونی عوامل کے علاوہ کچھ اندرونی عناصر نے بھی رکاوٹیں ڈالیں مگر ان کی ہر کوشش ناکام ہوئی۔ اب علاقے کے تمام ممالک اس کا حصہ بننے کے لئے تیار ہیں۔