ذمہ داری سے کہتا ہوں مراد سعید کو عمران خا ن نے چھپایا ،فیصل واوڈا

کراچی (ٹی وی رپورٹ) سابق وزیر فیصل واوڈا نے کہا ہے کہ سیاست کو شہداء کی قبر تک لے جانے پر پی ٹی آئی سے مذاکرات کا دروازہ بند ہوگیا ہے، مذاکرات کا دروازہ بند کر کے چابی کنویں میں پھینک دی گئی ہے، لو گ اپنی جان بچانے کیلئے عمران خان کو چھوڑ کر جارہے ہیں، مراد سعید کی جان و مال کی ذمہ داری عمران خان پر آگئی ہے، ذمہ داری سے کہتا ہوں مراد سعید کو عمران خا ن نے چھپایا ہوا ہے، ارشد شریف کیس میں مراد سعیدکی بہت اہمیت ہے۔وہ جیو کے پروگرام ”نیا پاکستان شہزاد اقبال کے ساتھ“ میں میزبان شہزاد اقبال سے گفتگو کررہے تھے۔ پروگرام میں وفاقی وزیر منصوبہ بندی احسن اقبال بھی شریک تھے۔ احسن اقبال نے کہا کہ عمران خان بند گلی سے نکلنے کیلئے مذاکرات کا کارڈ کھیل رہے ہیں ، نو مئی کے واقعات پر عمران خان کیخلاف بھی کارروائی ہوسکتی ہے، تحریک انصاف کو نو مئی کے واقعات پر قوم، مسلح افواج اور شہداء کے خاندانوں سے معافی مانگنا ہوگی، پی ٹی آئی الیکشن پر بات کرنا چاہے تو سینیٹ کا پلیٹ فارم موجود ہے۔میزبان شہزاد اقبال نے کہا کہ جہانگیر ترین نے نئی پارٹی بنانے کی تصدیق کردی ہے، جہانگیر ترین کی پارٹی میں جو لوگ پہلے ہی شامل ہیں انہوں نے بتایا کہ پی ٹی آئی چھوڑنے والے بہت سے لوگ جہانگیر ترین سے رابطے میں ہیں ، فیصل واوڈا نے کہا پی ٹی آئی سے مذاکرات کا دروازہ بند ہوگیا ، چابی کنویں میں پھینک دی گئی ہے، آج لو گ اپنی جان بچانے کیلئے عمران خان کو چھوڑ کر جارہے ہیں، جن سانپ ، کیڑوں اور گٹر کے کیڑوں کا میں ذکر کرتا تھا وہ رورہے ہیں، پی ٹی آئی سے جو بڑے نام آرہے ہیں وہ عمران خان کی جگہ لینا چاہتے ہیں ، فیصل واوڈا کا کہنا تھا کہ عمران خان نے مراد سعید کو مستقبل کا لیڈر بتایا ہے اب ان کی جان و مال کی ذمہ داری عمران خان پر آگئی ہے، مراد سعید عمران خان کے بہت قریب تھا ان کے بہت سے فیصلوں پر عمل کرتا رہا ہے، ارشد شریف کیس میں مراد سعید کی بہت اہمیت ہے، ارشد شریف کا لیپ ٹاپ بھی مراد سعید کے پاس ہے ، اسد عمر وہ نااہل، نکما اور زہریلا سانپ ہے جس نے عمران خان کو ڈسا ، کچھ گٹر کے کیڑوں نے کہا ہمیں گولی ماردی جائے تب بھی عمران خان کو نہیں چھوڑیں گے لیکن چار دن میں ساتھ چھوڑ گئے۔ فیصل واوڈا کا کہنا تھاکہ میں جہانگیر ترین کی پارٹی کا حصہ نہیں بن رہا ۔ احسن اقبال نے کہا نو مئی کے واقعات پی ٹی آئی کے لیڈرز کی پری پلان منصوبہ بندی تھی ، ہر چیز کے تانے بانے زمان پارک اور عمران خان تک پہنچ رہے ہیں ملک کے استحکام کیلئے تمام اسٹیک ہولڈرز کو ساتھ بیٹھ کر دس سال کے فارمولے پر اتفاق کرنا ہوگا ، زیارت ریذیڈنسی جلانے والوں کو دہشتگرد کہا جاتا ہے تو جناح ہاؤس جلانے والوں کو کیا کہیں گے، پی ٹی آئی کو سیاست بچانی ہے تو قوم اور مسلح افواج سے معافی مانگے۔