بھارت کا متعصبانہ رو یہ، علامہ اقبال سے متعلق مضمون نصاب سے نکال دیا

نئی دہلی(آئی این پی ) بھارت میں ایک بار پھر متعصبانہ رویے کا مظاہرہ کرتے ہوئے علامہ اقبال سے متعلق مضمون نصاب سے نکال دیا۔ بھارتی میڈیا کے مطابق غیرمنقسم ہندوستان کے لیے مشہور ترانہ سارے جہاں سے اچھا ہندوستاں ہمارا لکھنے والے اور نظریہ پاکستان کے خالق علامہ اقبال سے متعلق مضمون نصاب سے نکال دیا گیا ہے۔ رپورٹس کے مطابق دہلی یونیورسٹی کی اکیڈمک کانسل نے پاکستان کے قومی شاعر علامہ اقبال سے متعلق مضمون نکالنے کی قرارداد منظور کرلی۔ علامہ اقبال سے متعلق مضمون بی اے کے نصاب میں شامل ہے۔قرارداد کی منظوری کے بعد پولیٹکل سائنس کے نصاب میں شامل علامہ اقبال کے بارے میں مضمون کو نصاب سے نکال دیا گیا۔ یونیورسٹی انتظامیہ نے کہاہے کہ مضمون کو نصاب کو جدید بنانے کی مہم کے سلسلے میں حذف کیا گیا۔