پاکستان میں استحکام چاہتے ہیں،گرفتاریوں پر تشویش ہے،امریکی سینیٹر ز

اسلام آباد/واشنگٹن(این این آئی)امریکی سینیٹ کی خارجہ امور کمیٹی کے سربراہ سینیٹر باب میننڈیز نے پاکستان میں انسانی حقوق کی صورتحال پر تشویش کا اظہار کیا ہے۔پاکستانی امریکن ڈاکٹر آصف محمود سے ملاقات میں سینیٹر باب میننڈیز نے کہاکہ وہ پاکستان میں ہنگامہ آرائی نہیں، استحکام چاہتے ہیں،انہیں پاکستان میں بے گناہ گرفتار پاکستانی امریکنز کے بارے میں تشویش ہے۔دوسری جانب امریکی سینیٹر جان کورنین سے پی ٹی آئی امریکا کے رہنمائوں سجاد برکی اور عاطف خان کی ملاقات ہوئی۔پی ٹی آئی امریکا کے رہنمائوں نے دعویٰ کیا کہ سینیٹر کورنین نے کہا ہے کہ وہ معاملہ امریکی سینیٹ میں اٹھائیں گے۔اس کے علاوہ امریکی ایوان نمائندگان میں پاکستان کاکس کی سربراہ شیلا جیکسن کی جانب سے بھی پاکستان کی صورتحال پر تشویش کا اظہار کیا گیا ہے۔شیلا جیکسن نے کہاکہ پرامن مظاہرہ کرنے والوں کو تحفظ ہونا چاہیے۔ واضح رہے کہ اس سے قبل افغانستان کے لئے سابق امریکی خصوصی ایلچی زلمے خلیل زاد بھی عمران خان کیخلاف کارروائیوں پر اظہارتشویش کرچکے ہیں۔