پاکستان،پیٹرولیم مصنوعات کی درآمدات میں28 فیصد کمی ریکارڈ

اسلام آباد(این این آئی)پیٹرولیم مصنوعات کی درآمدات میں28.07فیصد کمی ریکارڈ کی گئی ہے۔ ادارہ شماریات کے اعداد و شمار کے مطابق گذشتہ سال جولائی سے رواں سال اپریل کے دوران پیٹرولیم گروپ کی کل درآمدات 13,974.610ملین ڈالر رہیں جبکہ گزشتہ سال کی اسی مدت کے دوران 17,033.574ملین ڈالر کی درآمدات تھیں۔پیٹرولیم مصنوعات کی درآمد 28.07فیصد کم ہوئی جبکہ جن مصنوعات میں مثبت نمو دیکھنے میں آئی ان میں مائع پیٹرولیم گیس شامل ہے جس کی درآمدات میں 3.53فیصد اضافہ ہوا۔رواں مالی سال کے پہلے 10ماہ کے دوران مجموعی طور پر پیٹرولیم گروپ کی درآمدات میں گزشتہ سال کی اسی مدت کے مقابلے میں17.96فیصد کمی ہوئی ہے۔رپورٹ کے مطابق مائع قدرتی گیس کی درآمدات میں 16.06فیصد کمی ہوئی اور گزشتہ سال 3,705.959ملین ڈالر سے کم ہو کر اس سال3,110.836ملین ڈالر رہ گئی جبکہ پٹرولیم خام تیل کی درآمد 1.98فیصد کمی کے ساتھ 4,221.208ملین ڈالر سے کم ہو کر 4,613.277 ڈالر رہ گئی۔ جن مصنوعات میں مثبت نمو دیکھنے میں آئی ان میں مائع پیٹرولیم گیس شامل ہے جس کی درآمدات میں 3.53فیصد اضافہ ہوا جو کہ گزشتہ سال 556.962ملین ڈالر سے بڑھ کر 576.618ملین ڈالر تک پہنچ گئی ۔ اپریل 2023کے دوران پیٹرولیم کی درآمدات 891.468ملین ڈالر ریکارڈ کی گئیں جبکہ اپریل 2022کے دوران 2,223.515ملین ڈالر کی درآمدات تھیں۔ ماہ بہ ماہ کی بنیاد پر اپریل2023کے دوران ملک میں پیٹرولیم کی درآمدات میں 26.11فیصد کی کمی ہوئی۔