سیاسی قیدیوں کے ساتھ ناروا سلوک بند کیا جائے،فرخ حبیب

فیصل آباد (آئی این پی) تحریک انصاف کے سینئر رہنما فرخ حبیب نے کہا ہے کہ سیاسی قیدیوں کے ساتھ ناروا سلوک بند کیا جائے، تحریک انصاف عوامی جماعت ہے آپ کے ان اقدامات سے ختم نہیں ہو گی۔میڈیا سے گفتگو کرتے ہوئے انہوں نے کہا کہ عمران خان نے کہا تھا حکومت گرائی تو معیشت نہیں سنبھالی جائے گی، شہباز شریف نے اقتدار میں آتے ہی 16 ارب کا کیس ختم کرایا شہباز شریف کے خلاف اوپن اینڈ شٹ کیس تھا، ملک لوٹنے والے باعزت بری ہو گئے، یہ ان کی گزشتہ ایک سال کی ترجیحات رہیں، عمران خان کے خلاف 150 سے زائد مقدمات بنائے گئے۔ انہوں نے کہا کہ آپ اس طرح کے اقدامات سے لوگوں کے اندر غم و غصہ بڑھا رہے ہیں، تحریک انصاف ایم کیو ایم نہیں عوامی جماعت ہے، ہم ملک میں نئے انتخابات کی طرف پیشرفت چاہتے ہیں، امید کرتا ہوں ہماری بات کو ٹھنڈے دماغ سے سنا جائے گا۔انہوں نے کہا کہ حق حکمرانی عوام کو منتقل کریں وہ فیصلے کرے، جو جنگ آپ لڑ رہے ہیں اس سے کوئی فاتح نہیں ہوگا، نقصان عوام کا ہوگا۔