9مئی کی توڑ پھوڑ عمران کے منفی ایجنڈے کو بے نقاب کرتی ہے،امیرمقام

پشاور (اے پی پی) وزیراعظم کے مشیر برائے سیاسی و عوامی امور و قومی ورثہ انجینئر امیر مقام نے کہا ہے کہ9مئی کی توڑ پھوڑ نے عمران نیازی کے منفی ایجنڈے کو بے نقاب کر دیا ، پی ٹی آئی نے اپنے9سالہ دور حکومت میں خیبرپختونخوا کے عوام کو ترقی سے محروم رکھا ۔یہاں عوامی اجتماع سے خطاب کرتے ہوئے انہوں نے کہا کہ سوات میں نواز شریف حکومت کی جانب سے شروع کیے گئے گیس کے منصوبے عمران نیازی کی حکومت نے روکے جس سے عوام کو مشکلات کا سامنا کرنا پڑا، پی ٹی آئی کے 9 سالہ دور حکومت میں خیبرپختونخوا میں ترقی کا عمل بری طرح متاثر ہوا جبکہ سوات سمیت پورا مالاکنڈ ڈویژن بھی ترقی اور عوامی فلاح و بہبود کے پروگراموں سے محروم رہا۔انہوں نے کہا کہ 9 مئی کی توڑ پھوڑ کے نتیجے میں عوامی، سرکاری اور دفاعی تنصیبات کو جو تباہی ہوئی وہ انتہائی قابل افسوس امر ہے اور مجرم قانون کی گرفت سے نہیں بچ سکتے۔ انہوں نے کہا کہ سوات میں گیس کے رکے ہوئے منصوبوں پر کام دوبارہ شروع کر د یا گیا ہے اور یہ تمام منصوبے وقت پر مکمل ہوں گے۔