لاہور ،ماڈل ٹاؤن کچہری میں آتشزدگی،درجنوں وکلا چیمبرز خاکستر

لاہور ( این این آئی) لاہور کی ماڈل ٹائون کچہری میں آتشزدگی سے وکلاء کے چالیس سے زائد چیمبرز جل کر خاکستر ہوگئے ۔لاہور میں ماڈل ٹائون کچہری میں نماز فجر کے وقت پل کے نیچے واقع وکلاء کے چیمبرز میں اچانک آگ بھڑک اٹھی، آگ نے دیکھتے ہی دیکھتے پل کے نیچے واقع 40کے قریب دفاتر کو اپنی لپیٹ میں لے لیا۔لوہے اور فائیبر شیٹ سے بنے دفاتر میں لگی آگ کی زد میں لاکھوں روپے کا سامان اور ضروری کاغذات جل کر راکھ کا ڈھیر بن گئے۔ریسکیو نے اطلاع ملتے ہی فوری طور پر آگ پر قابو پایا تاہم آتشزدگی کی وجہ سے کوئی جانی نقصان نہیں ہوا۔وکلا کا کہنا ہے کہ اس واقعے کی انتظامیہ آگ لگنے کے واقعے کی تحقیقات اور ان کے نقصان کا ازالہ کیا جائے۔وکلا اور ان دفاتر میں کام کرنے والے افراد راکھ میں سے اپنا قیمتی سامان ڈھونڈتے رہے۔ریسکیو ذرائع کا کہنا ہے کہ آگ لگنے کی وجوہات کا تعین نہیں ہو سکا، فائبر، کاغذ اور لکڑی کا فرنیچر ہونے کی وجہ سے آگ تیزی سے پھیلی۔